Galicia segue sen chegar ás cifras de 2007 en persoas asalariadas por fogar
O 59,87% dos fogares galegos ten polo menos unha persoa asalariada.
Por Europa Press / Redacción | SANTIAGO DE COMPOSTELA | 03/03/2023 | Actualizada ás 11:33
O 59,87% dos fogares galegos tiña polo menos unha persoa asalariada en 2021, segundo datos o Estudo de salarios publicado este venres polo Instituto Galego de Estatística (IGE), recollidos por Europa Press.
Esta cifra supón unha mellora respecto de 2020 de 0,8 puntos porcentuais e habería que remontarse a 2008 para atopar un dato superior. Nese ano, cando estalou a crise económica mundial, un 61,33% dos fogares galegos tiña polo menos algunha persoa asalariada.
O IGE explica que a incidencia dos fogares con algún salario en Galicia diminuíu lentamente desde o 2007 ata os anos 2013 e 2014, cando se situou por baixo do 55%. Nos seguintes cinco anos aumentou lixeiramente. Con todo, en 2020 rompeu a serie de crecemento e baixou, pero en 2021 recuperouse a subida, aínda que sen conseguir aínda niveis de 2007 (61,11%).
Por tipoloxía do fogar, os fogares do tipo parella con fillos son os que máis incidencia de persoas asalariadas teñen (87,49%). No outro extremo atópanse os fogares unipersonales, onde só o 29,45% son persoas asalariadas.
Entre outros datos, no ano 2021 o 46,7% dos fogares galegos tiña como fonte principal de ingresos os salarios, seguidos dos fogares que tiñan como fonte principal algunha prestación (43,12%). Pola súa banda, os fogares onde a fonte principal de ingresos era o traballo por conta propia non chegaban ao 9%.
