Por E.P. | SANTIAGO DE COMPOSTELA | 06/03/2023 | Actualizada ás 14:13
O portavoz parlamentario do PPdeG, Pedro Puy, afeou ao Goberno a falta de desenvolvemento das medidas incluídas no pacto de Estado contra a violencia de xénero, unha situación que considera que se está "tapando" pola problemática relativa á 'Lei do só si é si'.
Nunha rolda de prensa ofrecida este luns na Cámara galega, o dirixente popular lembrou as iniciativas que a súa formación levará ao pleno do Parlamento que arrinca este martes e que coincidirá coa celebración do Día Internacional da Muller.
Na sesión, os populares galegos reivindicarán a través dunha proposición non de lei a necesidade de reformar esta norma que derivou nunha "rebaixa significativa" das penas de moitas persoas que están condenadas por agresións sexuais.
Ademais, urxiu a "posta en marcha xa" do pacto de Estado contra a violencia de xénero. "Cremos que, por outras prioridades lexislativas, entre elas esta --en referencia á citada lei-- queda como deixado de lado", sostivo para lembrar a importancia das súas medidas para loitar contra a violencia de xénero e as agresións sexuais.
Así, criticou que "en certa medida estea a taparse o debate" da falta de desenvolvemento deste pacto e reclamou que se implanten todas as medidas que están pendentes de ser impulsadas ou aprobadas nas Cortes xerais.
Tamén no pleno que comeza este martes, o Grupo Popular demandará a mellora do servizo ferroviario de ancho métrico (a antiga Feve), que en Galicia conecta as localidades de Ferrol e Ribadeo, para despois continuar por Asturias, Cantabria, País Vasco e Castela e León.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.