O BNG insiste na prohibición de parques eólicos na costa: "Tratan de privatizar o mar"
Alertan das consecuencias na pesca e piden estudos socioeconómicos da implantación da eólica mariña en Galicia
Por E.P. | Galicia | 07/03/2023 | Actualizada ás 20:38
O Bloque Nacionalista Galego (BNG) pediu este martes á Xunta que solicite ao Goberno central a prohibición de instalar parques eólicos mariños na costa galega ante a "afectación" que, ao seu xuízo, terían estes elementos á pesca.
Así o sinalou nunha proposición non de lei defendida no pleno do Parlamento de Galicia por Rosana Pérez Fernández, quen criticou tanto ao Executivo central como ao Goberno autonómico por "tratar de privatizar o mar" e apoiar ás empresas enerxéticas.
Neste contexto, cargou tanto contra o PSOE, como contra Podemos e o PP por permitir a instalación de parques eólicos en zonas onde a pesca ten un uso extensivo e con grandes caladoiros.
Pérez Fernández fixo un repaso pola importancia da pesca para Galicia que, segundo os seus datos, supón máis de 60.000 postos de traballo directos se se ten en conta toda a cadea mar-industria.
"Onde van quedar os beneficios millonarios destas instalacións? Onde pagarán impostos e canto repercutirá na economía dos pobos costeiros? As eléctricas mandan e os gobernos obedecen", criticou a deputada nacionalista, que tamén pide, entre outros elementos, estudos socioeconómicos da implantación da eólica mariña na Comunidade.
CRÍTICAS DO PP E DO PSOE
Desde o Partido Popular, Marta Nóvoa puxo en valor que o desenvolvemento deste sector é "clave" para Galicia, aínda que si defendeu o diálogo co sector pesqueiro e coas comunidades que van acoller estas instalacións. Así, criticou a actitude do Executivo central, "que non quixo acordar" os Plans de Ordenación dos Espazos Mariños (POEM).
Tamén o PSdeG criticou a proposición do Bloque, "que pide a prohibición dos parques eólicos e tamén estudos dos mesmos". En concreto, Patricia Otero explicou que os POEM son zonas onde potencialmente se poderían instalar estes muíños, sen que supoñan unha autorización directa.
A pesar de todo, o Bloque aceptou a emenda do PP como engadido aos puntos da súa proposta. O texto votarase este mércores.
