Silleda acollerá o 20 de maio as probas para avaliar competencias en matemáticas e lingua da Xunta
Segundo o Goberno galego nun comunicado, con estas medidas, as persoas que pasen estas probas poderán acceder á formación para o emprego e cursar os certificados de profesionalidade de nivel 2 e 3.
Por E.P. | SANTIAGO DE COMPOSTELA | 09/03/2023 | Actualizada ás 20:28
A Xunta anunciou que celebrará o próximo 20 de maio no recinto feiral de Silleda, en horario de mañá e tarde, as probas de avaliación en competencias clave para que as persoas que non posúen a Educación Secundaria Obrigatoria (ESO) ou o Bacharelato poidan acreditar os seus coñecementos.
Segundo trasladou o Goberno galego nun comunicado, con estas medidas, as persoas que pasen estas probas poderán acceder á formación para o emprego e cursar os certificados de profesionalidade de nivel 2 e 3, que os inclúen como requisito.
Deste xeito, a Consellería de Promoción do Emprego e Igualdade publicou este xoves na súa web a relación provisional de admisións e exclusións. Así tamén se abre un prazo de reclamacións ata o 15 de marzo.
En total presentaron a súa solicitude para participar nesta convocatoria un total de 2.424 persoas, ás que se valorará as súas competencias en matemáticas e comunicación en lingua castelá, galega e inglesa.
