Eólica de Galicia pide ás administracións dialogar cos sectores afectados polo POEM

A Asociación Eólica de Galicia instou ás administracións competentes a dialogar cos sectores afectados polo Plan de Ordenación de Eólica Mariña (POEM) que prevé a instalación de aeroxeradores no mar.

Nun comunicado destacan a constitución do Observatorio da Eólica Mariña de Galicia, coordinado polo Instituto Enerxético de Galicia, no que están representados todos os actores e cuxo obxecto é "servir de foro de diálogo, encontro e análise da compatibilidade do desenvolvemento eólico coas actividades marítimo-pesqueiras".

"Os Plans de Ordenación do Espazo Marítimo recentemente aprobados polo Executivo español son só un marco de referencia xeral. Está todo por falar e acordar, incluíndo as correspondentes poxas e proxectos suxeitos a todas as cautelas ambientais", matizan.

Apuntan ademais que non se debe esquecer que a eólica mariña é "unha enerxía limpa e renovable que rebaixa notablemente o prezo da luz e que necesitan os novos proxectos industriais de carácter estratéxico".

Plataforma eólica mariña | Fonte: Windplus