"Se o cliente está as 24 horas na rede, as empresas tamén deben estalo"

Cos relatorios Iago Varela, Cristina Moreira, Óscar Reboiras e Verónica Ramallal, Ciencias Sociais e da Comunicación celebrou este luns por primeira vez o Día Mundial do Community Manager, grazas a unha xornada coordinada polo profesor Xabier Rolán. Óscar Reboiras, membro do equipo de social media de R, centrou a súa intervención no valor das redes sociais como plataformas de atención ao cliente.

Por Galicia Confidencial | Pontevedra | 26/01/2015 | Actualizada ás 22:44

Comparte esta noticia

“Non estamos a falar dunha moda pasaxeira, senón dunha realidade. Nos últimos cinco anos, en España duplicouse o número de usuarios de redes sociais”. Con estas verbas subliñaba a decana de Ciencias Sociais e da Comunicación, Emma Torres, a importancia que teñen no mundo da comunicación estas novas ferramentas, co gallo da celebración no centro do primeiro Social Media Day.

Rolán, Ramallal, Reboiras, Varela, Moreira e Torres
Rolán, Ramallal, Reboiras, Varela, Moreira e Torres

. Na inauguración do acto, Torres salientou a vontade do profesorado do centro por abordar un “fenómeno que é xa unha clara realidade”, a pesares de que “os plans de estudos van algo máis lentos que a evolución dos medios de comunicación”. Neste senso, Torres fixo destacou a importancia de contar nesta xornada con “profesionais de referencia dos social media en Galicia, que ademais, nalgúns casos, son ex-alumnos da facultade” co obxectivo de propor un achegamento “desde o punto de vista académico e profesional” a un futuro campo de traballo para os titulados e tituladas no que, ademais, como engadiu Rolán, “será preciso, co paso dos anos, unha maior especialización”.

Un escaparate empresarial e persoal

O coordinador do blog Mallando no Android, Iago Varela, foi o encargado de abrir estas xornadas relatando o valor que tiveron as redes sociais para a campaña que levaron a cabo desde este portal para solicitar unha versión do sistema operativo Android en galego. “As redes sociais constitúen unha ferramenta básica para axudar a construír unha comunidade arredor dun medio especializado”, destacou este relator, que incidiu no valor que ten “interactuar coa xente” e coñecer as súas opinións á hora de levar a bo porto calquera iniciativa. Mais ao mesmo tempo, Varela tamén apuntou ao alumnado presente no acto da importancia de desenvolver a súa “personalidade social”, de empregar as redes sociais “parar que outros nos coñezan e saiban que facemos e como o facemos”, algo que, engadiu, “axudaravos a atopar traballo”.

Neste senso, a xestora de comunidades virtuais Verónica Ramallal centrou precisamente a súa intervención na “creación dunha marca persoal” a través da rede. Aínda que o proceso inicial, apuntou, “sexa o mesmo que antes” e pase por un labor de “autocoñecemento e o desenvolvemento dunha estratexia”, as ferramentas para difundir esa imaxe teñen mudado por completo. “Pero realmente, iso é positivo, posto que dispós de moitos máis canais, só tes que aprender a diferenciar para que serve cada un e conseguir dalgún xeito chamar a atención nunha contorna na que todo o mundo ten acceso a todo tipo de información”, engadiu Ramalla, que recomendou “ser activos nas rede sociais, pero tamén saber medir os tempos e ter unha presenta correcta, xa que todo o que fas, para ben ou para mal, ten moita máis repercusión”.

Aló onde están os teus clientes

Co obxectivo de achegar ao alumnado “a un campo importante, que ás veces queda un pouco de lado”, Óscar Reboiras, membro do equipo de social media de R, centrou a súa intervención no valor das redes sociais como plataformas de atención ao cliente. “Hoxe en día a xente está conectada a internet as 24 horas e unha empresa ten que estar onde están os seus clientes, polo que non podes facer é mirar para outro lado”, apuntou este community manager, que ve nas redes sociais unha “plataforma inmellorable para saber que opinan de ti”. Neste senso, Reboiras incidiu en que “as redes sociais son fundamentais no proceso posvenda”, posto que é entón cando os clientes van interactuar coa empresa á que adquiriron un determinado produto ou servizo. E se non están conformes, dispoñen “dunha canle de comunicación onde aumentar a repercusión da súa queixa”.

De feito, segundo Reboiras, “moitos usuarios chegan ás redes sociais despois de que non se lles solucionase adecuadamente o seu problema, polo que as empresas deben ter en conta que pode ser a última oportunidade para facer ben as cousas”.

Nesa mesma liña, a deseñadora Cristina Moreira afondou na necesidade de que as empresas sexan capaces de “reflectir a súa personalidade” a través das redes sociais, campo no que cobra especial relevancia a súa “identidade visual”. Neste senso, Moreira fixo énfase na importancia que ten a imaxe nas redes sociais, nas que constitúe unha ferramenta coa que “complementar as palabras, que facilita tanto a percepción da túa mensaxe como que esta capte máis a atención do espectador”.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta