Un especial do Consello da Cultura documenta o labor das asociacións galegas en Cuba

O proxecto 'Historias de ida e volta', do Consello da Cultura Galega, lanzou un novo especial que recolle e documenta o labor realizado polas numerosas sociedades microterritoriais creadas polos emigrantes en Cuba e que buscaban fomentar o progreso e mellorar as condicións de vida nas súas localidades natais.

Tal e como explica o CCG, "a solidariedade e a empatía dos emigrantes galegos fronte ás adversidades que atopaban os seus compatriotas nos países de acollida fomentaron a posta en marcha de asociacións étnicas de diversa tipoloxía".

Ademais da fundación de centros asistenciais e benéficos, a partir do último terzo do século XIX os grupos de veciños asentados en América solicitaron o apoio económico a través da prensa da colectividade para contribuír ao desenvolvemento das súas localidades de orixe.

Fomentábase, así, a unión da emigración orixinaria dun determinado lugar, parroquia, municipio ou comarca, para enviar remesas coas que cubrir necesidades puntuais ou mellorar algúns aspectos da vida cotiá dos seus paisanos.

A primeira sociedade de ámbito local constituída como tal fundouse na Habana en 1904 baixo o nome de Alianza Aresana de Instrución e, a partir do seu exemplo, empezou a crearse unha densa rede de asociacións microterritoriais orientadas a mellorar a situación dos galegos en Galicia.

Así mesmo, apuntan desde o CCG, a creación e mantemento de centros de ensino foi tamén unha prioridade para outras sociedades étnicas, como a Sociedade de Instrución Unión Barcalesa; a Sociedade de Instrución e Beneficencia Fillos do Concello de Cerdido, ou a Sociedade de Instrución Progreso de Coles.

A protección dos asociados que estivesen en risco social ante unha enfermidade ou que necesitasen ser repatriados a Galicia foi tamén unha cuestión á que atenderon algunhas sociedades.