Seguen as tensións entre Podemos e Yolanda Díaz para chegar a acordos
Yolanda Díaz afirma que lle "encantaría" que Belarra e "moita xente" de Podemos acuda ao acto do domingo para arroupala.
Por Europa Press / Redacción | MADRID | 29/03/2023 | Actualizada ás 10:37
A vicepresidenta segunda, Yolanda Díaz, afirmou este mércores que lle "encantaría" que ao acto de Sumar o vindeiro domingo, onde se prevé que faga oficial o anuncio da súa candidatura, asistan "moitas persoas" de Podemos e a súa secretaria xeral, Ione Belarra. Así o indicou en declaracións aos medios de comunicación nos corredores do Congreso, onde sinalou que está "moi contenta" con ese evento de presentación da nova fase de Sumar, a plataforma que impulsa.
Tamén fixo un chamamento a "todo o país" a Sumar e a presenza das formacións que lle acompañasen nese paso, que son "moitísimas". A formación morada condicionou a súa presenza para arroupar a Díaz nese evento a subscribir previamente un pacto bilateral de mínimos con Sumar sobre a futura confluencia, baseado no compromiso dunhas primarias abertas.
NEGOCIACIÓNS SEN AVANCES
Por agora, as negociacións entre ambas as partes seguen sen avances, como quedou patente no último contacto dos equipos negociadores o pasado luns. Desde Podemos indicaron que o equipo de Díaz trasladoulles que por agora declinaban pechar un acordo bilateral sobre primarias abertas.
Mentres, desde a plataforma explicaron aos morados que non hai ningún problema coa celebración dese proceso aberto á cidadanía, pero deixaron claro que o marco debe ser multilateral. De feito, ofreceron a Podemos subscribir unha declaración política para pechar un acordo de primarias, pero piden á formación que acceda a recoñecer que ese pacto é aberto e extensible ao resto de partidos (unha quincena), aos que non poden obviar.
Onte, a ministra de Igualdade e 'número dous' de Podemos, Irene Montero, dixo que o requisito de primarias abertas para poder arroupar a Díaz é "sinxelo" e "perfectamente asumible". Á súa vez, distintas ramas de Unidas Podemos trataron de rebaixar a tensión tras fracasar o intento entre Podemos e Sumar para lograr un pacto de mínimos, sobre o asunto das primarias, e apelaron a conseguir un acordo que permita a unidade da esquerda independente ao PSOE.
Polo momento, confirmaron a súa presenza o deputado de Galicia en Común e ex coordinador galego de Podemos, Antón Gómez-Reino, e tamén o líder da formación morada en Galicia, Borja San Ramón, que o día anterior acudirá ao Consello Cidadán do seu partido.
