Unha crecida do caudal do Miño acaba co rescate de tres mozos en Ourense
Os tres rapaces decidiron acubillase nas bases da Ponte Vella da cidade.
Por Europa Press / Redacción | OURENSE | 17/04/2023 | Actualizada ás 10:50
Tres mozos quedaron atrapados na base da ponte Vella de Ourense na tarde deste pasado domingo tras rexistrarse unha subida do caudal do río Miño, que lles impedía volver a terra.
Os feitos ocorreron pasadas as 21,00 horas e, segundo informa o 112 Galicia, os tres homes buscaron acubillo na base desta construción ao verse sorprendidos pola subida do caudal do río.
A pesar de que se atopaban en bo estado, o nivel de auga impedíalles alcanzar a beira, polo que se pediu axuda aos servizos de emerxencia para achegalos a terra. Así, o Centro Integrado de Atención ás Emerxencias solicitou a colaboración dos bombeiros e dos axentes da Policía Local e Nacional.
Cando chegaron os efectivos de rescate, comprobaron que un dos mozos estaba xa fóra, pero os outros dous necesitaban axuda. Así, procederon a sacalos da base da ponte. Non necesitaron asistencia médica ao atoparse en bo estado.
