As medidas acordadas na Mesa Sectorial de Sanidade afectarán a máis de 40.000 traballadores fixos ou temporais
Haberá unha redución paulatina da xornada semanal ata cumprirse as 35 horas en 2025 ou o establecemento dos días 24 e 31 de decembro como festivos a efectos de cobro a todo o persoal.
Por E.P. | SANTIAGO DE COMPOSTELA | 21/04/2023 | Actualizada ás 14:51
O conselleiro de Sanidade, Julio García Comesaña, reivindicou o acordo alcanzado na noite do xoves por unanimidade na Mesa Sectorial --cos sindicatos CIG, CCOO, CSIF, Satse e UGT-- entre os "máis importantes dos últimos anos", xunto ao que regula a carreira profesional.
En declaracións remitidas aos medios este venres, tras unha negociación que se estendeu das 10,00 da mañá ata as 23,00 da noite, García Comesaña subliñou que as condicións acordadas afectarán a "máis de 43.000 traballadores con emprego fixo ou temporal" e aplicaranse de forma paulatina ata 2025, empezando o 1 de xullo de 2023.
Moitas destas medidas, explicou o conselleiro, son "concrecións" do acordo de intencións alcanzado o 31 de marzo --con todos os sindicatos da Mesa Sectorial, fóra da CIG-- para establecer o diálogo en torno ao plan de ordenación de recursos humanos.
En definitiva, "xunto coa carreira profesional", García Comesaña insistiu en que é o pacto "máis importante dos últimos anos" en materia de condicións e salarios, "máxime tras os esforzos derivados da pandemia".
Sobre as gardas, que subirán un 7,9% en xornada ordinaria --igual que o complemento de nocturnidade--, o conselleiro celebrou que se situará "en sétima posición" de entre os sistemas autonómicos de saúde. No caso da atención continuada, que aumentará un 15,6%, colocará a Galicia entre o "tres primeiros" postos.
Todo iso xunto coa paulatina redución da xornada semanal ata cumprirse as 35 horas en 2025, a consideración da noite do venres como 'pre festiva' e o establecemento dos días 24 e 31 de decembro como festivos a efectos de cobro a todo o persoal para o que non estaba así contemplado.
Por iso, o conselleiro de Sanidade, que aparece como un dos asinantes do documento, agradeceu o "esforzo" dos sindicatos da Mesa Sectorial e "de todos en xeral" por alcanzar acordos que "colocan aos traballadores da sanidade pública galega nunha posición mellor" aínda que xa partían de "a metade" da táboa das autonomías.
En similares termos pronunciouse a directora xeral de Recursos Humanos do Sergas, Ana Comesaña, quen sinalou o pacto como "de gran relevancia non só polo importe económico que leva aparellado, senón tamén porque afecta a todas as categorías, tanto de hospital como de Atención Primaria".
"Estou moi contenta porque había moi bo ánimo negociador desde o primeiro momento. Estudamos todos os detalles e creo que así se fan as cousas: falando, negociando e sen necesidade de chegar a ningún conflito", sentenciou a directora xeral.
Cabe lembrar que, un día antes do da Mesa Sectorial, a Administración alcanzaba coa Confederación Estatal de Sindicatos Médicos (CESM) un acordo similar, principalmente retributivo, pero que só se contemplaba para os facultativos e que serviu para parar unha folga que se estendeu durante nove días, do 11 ao 19 de abril.
