CCOO pide abrir unha negociación con Política Social en base ao acordo para o persoal do Sergas
"Actualmente, o persoal de Política Social non cobra máis por traballar en domingos ou festivos, nin dispón dun tempo adicional de descanso", sinalan desde o sindicato.
Por E.P. | Santiago | 24/04/2023 | Actualizada ás 15:43
CCOO reclama á Consellería de Política Social e Xuventude que abra unha negociación que teña como base o acordo conseguido a semana pasada no ámbito da Mesa Sectorial do Servizo Galego de Saúde (Sergas), con melloras retributivas e a xornada de 35 horas para todos os traballadores da sanidade pública a partir de 2025.
En concreto, segundo informa nun comunicado, o sindicato remitiu un escrito á titular de Política Social, Fabiola García, para que se inicie unha mesa de diálogo neste sentido. Fronte ás condicións acordadas na sanidade, CCOO lamenta que o persoal destoutra consellería "vén sufrindo recortes nos seus dereitos e retribucións desde o ano 2012".
"Actualmente, o persoal de Política Social non cobra máis por traballar en domingos ou festivos, nin dispón dun tempo adicional de descanso polo traballo realizado neses días. Tampouco goza da vantaxe que supón a consideración de festivos dos días 24 e 31 de decembro, á vez que a súa xornada laboral segue sendo de 37,5 horas semanais", enumera o sindicato. Por iso, CCOO pide a García que se abra a introducir estas "importantes melloras" nos traballadores da súa Consellería porque prestan "servizos similares" aos sanitarios.
CESM REIVINDICA O ACORDO
Por outra banda, a Confederación Estatal de Sindicatos Médicos (CESM), que en pasadas semanas promoveu unha folga de facultativos, reivindica para si as melloras acordadas o xoves pasado entre o Sergas e os sindicatos que si están representados na Mesa Sectorial (CIG, CCOO, CSIF, Satse e UGT), que supuxeron "un punto de inflexión".
Noutro comunicado, CESM "agradece" a estas organizacións que achegasen o seu "granito de area" ao día seguinte da reunión que mantivo esta central coa Administración para parar a folga.
CESM congratúlase de que estas organizacións "fosen incorporando, paulatinamente nas súas últimas reunións" co Sergas, "boa parte das demandas recollidas na táboa reivindicativa" coa que se convocóla folga, "ben para tratar de evitar unha folga, antes da súa convocatoria, ou quizais para tratar de que se desconvocase unha vez iniciada".
"Durante este nove días de folga conseguíronse, para os facultativos e para o MIR, melloras que non se lograron en 12 anos, nin desde a Mesa Sectorial nin desde as manifestacións convocadas por outras organizacións sanitarias", esgrime.
Con todo, CESM sinala que "o verdaderaramente importante" é que estas medidas son un "punto de inflexión" e "de partida", porque agora a Administración exponse "con seriedade a necesidade de reverter a situación que atravesa na actualidade o sistema sanitario de Galicia".
