Os galegos tiveron unha renda bruta dispoñible de pouco máis de 15.000 euros no 2020, 660 euros menos que a media
Sitúase como a décima comunidade española con maior renda dispoñible bruta
Por Europa Press / Redacción | Santiago de Compostela | 26/04/2023 | Actualizada ás 16:12
A renda dispoñible bruta dos fogares galegos por persoa quedou nos 15.157 euros en 2020, o que supón 660 euros menos que a media nacional (15.817 euros), segundo o informe de Contabilidade Rexional de España publicado este mércores polo Instituto Nacional de Estatística (INE), recollido por Europa Press.
Desta maneira, Galicia sitúase como a décima comunidade española con maior renda dispoñible bruta, por detrás de País Vasco, Madrid, Navarra, Cataluña, Aragón, Asturias, A Rioxa, Castela e León e Cantabria.
Entre outros datos, o documento recolle que o Produto Interior Bruto (PIB) galego incrementouse un 5,1% en 2021, despois da caída do 9,1% en 2020 e do incremento do 1,4% en 2019, antes da pandemia.
Estas cifras supoñen que o PIB da Comunidade subiu en 2021 menos que a media nacional (+5,5%), aínda que tamén caeu menos en 2020 que o conxunto de España (-11,3%) e incrementouse por baixo en 2019 (+2%). O PIB per cápita galego foi de 23.499 euros en 2021, por baixo dos 25.498 euros da media nacional.
DATOS NACIONAIS
A nivel nacional, a estimación avance de 2021 da Contabilidade Nacional Anual de España, publicada en setembro, estimou nun 5,5% a taxa de crecemento en volume do PIB. Este dato supón un incremento de catro décimas respecto ao adiantado pola Contabilidade Nacional Trimestral de España.
Así, unha vez incorporadas ditas estimacións na CRE, despréndese que as rexións que incrementaron en maior medida o seu PIB hai dous anos foron ambos os arquipélagos e Navarra, seguidas de Cataluña (5,8%). Por contra, as que presentaron un menor aumento real foron as cidades autónomas de Ceuta (4,0%) e Melilla (4,1%) e as comunidades autónomas de Castela e León (4,3%) e Aragón (4,4%).
Cabe sinalar que o dez rexións que creceron por baixo da media en 2021 rexistraran unha diminución do seu PIB menor que a do total nacional en 2020. Pola súa banda, dez territorios presentaron incrementos do seu PIB superiores ao da Unión Europea (UE-27), que foi do 5,4%. Estas son Baleares, Canarias, Navarra, Cataluña, Cantabria, Comunitat Valenciana, Andalucía, Asturias, País Vasco e Madrid.
PIB REXIONAL POR HABITANTE
A Comunidade de Madrid rexistrou o PIB per cápita máis elevado en 2021, con 34.821 euros por habitante. Por detrás situáronse País Vasco (32.925 euros) e Comunidade Foral de Navarra (31.024 euros). Por contra, as rexións con menor PIB per cápita foron Andalucía (18.906 euros por habitante), Canarias (18.990) e Estremadura (19.072).
RENDA DISPOÑIBLE BRUTA DOS FOGARES EN 2020
Os fogares de País Vasco foron os que tiveron maior Renda Dispoñible por habitante en 2020, con 20.479 euros. Esta cifra foi un 29,5% superior á media de España. Por detrás situáronse Comunidade de Madrid (19.470 euros per cápita) e Comunidade Foral de Navarra (17.895 euros).
Pola contra, os rexistros máis baixos corresponderon a Canarias (12.410 euros por habitante), a cidade autónoma de Melilla (12.793) e Andalucía (12.844). A renda dispoñible bruta (RDB) por habitante de España en 2020 foi de 15.817 euros.
