A Lei de Vivenda supera no Congreso o seu primeiro trámite
O Senado será o encargado de certificar se o texto legal entra en vigor antes do 28M.
Por Europa Press / Redacción | MADRID | 27/04/2023 | Actualizada ás 16:10
O Congreso dos Deputados aprobou este xoves o proxecto de Lei polo Dereito á Vivenda cun respaldo de 176 votos, que representan a maioría absoluta do hemiciclo, fronte a 167 en contra e unha abstención, a do deputado do BNG, Néstor Rego.Os nacionalistas galegos consideran que hai avances, pero foron "insuficientes", e Rego criticou especialmente a "invasión de competencias".
En concreto, o texto contou co voto a favor de PSOE, Unidas Podemos, Esquerra Republicana (ERC), Bildu, Máis País, Compromís, o PRC e Teruel Existe. En contra situáronse o PP, Vox, Cidadáns e Foro Asturias, pero tamén o PNV, Junts, PDeCAT, a CUP e Coalición Canaria.
A norma, que levaba no Congreso bloqueada máis dun ano, pasará agora ao Senado, co obxectivo de que se acelere a súa tramitación para que entre en vigor antes das eleccións autonómicas e municipais do 28 de maio.
Entre outras medidas, a Lei de Vivenda imporá novos límites á subida do prezo do aluguer en toda España, permitirá rebaixar a figura de gran posuídor de vivenda de dez a cinco inmobles en determinados casos e impedirá a estes propietarios desahuciar a inquilinos vulnerables sen un acto de conciliación ou arbitraxe previa.
En concreto, a norma mantén o límite do 2% para este ano na subida do aluguer e elévao ata o 3% en 2024 para, antes do 31 de decembro do próximo ano, crear un novo índice de referencia aplicable ao territorio á marxe do IPC. Por outra banda, estenderá ás persoas físicas as restricións para arrendadores contempladas en zonas tensionadas.
Ademais, a nova lei introduce unha batería de medidas para dificultar os desafiuzamentos de persoas en situación de vulnerabilidade económica, especialmente cando o arrendador sexa un gran posuídor de inmobles. Deste xeito, os desafiuzamentos non poderán realizarse sen unha hora e unha data predeterminada.
