O PSdeG critica que o Sergas "desatende" as persoas adictas ao xogo por non consideralas "enfermas"
O deputado socialista Julio Torrado destacou que Galicia ten "a peor taxa de profesionais de saúde mental en calquera categoría" en todo o Estado.
Por E.P. | SANTIAGO DE COMPOSTELA | 27/04/2023 | Actualizada ás 17:14
O PSdeG denunciou este xoves que o Servizo Galego de Saúde (Sergas) "deixa desatendidas" ás persoas con adicción ao xogo ao "non diagnosticalas" e "non ser recoñecidas como enfermas".
Na Comisión 5ª, Sanidade, Política Social e Emprego, o deputado socialista Julio Torrado destacou que Galicia ten "a peor taxa de profesionais de saúde mental en calquera categoría" en todo o Estado, xa que "apenas conta cun psicólogo por cada 400.000 habitantes en cada área sanitaria". Desta maneira, indicou que a Lei do Xogo, á espera de terminar o seu debate na Cámara galega, "constitúe unha oportunidade perdida para garantir a atención sanitaria destas patoloxías".
Na súa resposta, o director xeral de Asistencia Sanitaria do Sergas, Jorge Aboal, fixo fincapé no "compromiso" do Goberno galego para "atallar" esta problemática a través da prevención, a atención sanitaria e o marco regulatorio. Deste xeito, indicou que actualmente aos programas de prevención súmanse 23 centros conformados por profesionais da psicoloxía e da psiquiatría, entre outras iniciativas, ás que a Xunta destina máis de 11 millóns de euros.
Así mesmo, Aboal engadiu a importancia de colaborar con entidades deste sector, co obxectivo de levar a cabo "programas sociosanitarios para que estas persoas sexan atendidas".
