Por E.P. | SANTIAGO DE COMPOSTELA | 28/04/2023 | Actualizada ás 20:35
O último pleno ordinario da Deputación de Pontevedra do actual mandato aprobou pola total unanimidade da corporación --co 'si' dos dous grupos do goberno, PSdeG e BNG, e do PP-- transferir á Xunta de Galicia a Escola de Cantaría.
Segundo informa a institución provincial, trátase da aprobación inicial do traspaso deste centro de formación que, tras un período de información pública de 20 días, será elevada a definitiva. A partir dese momento, a Escola quedará adscrita á Consellería de Cultura, Educación, FP e Universidades.
A presidenta da Deputación pontevedresa, Carmela Silva, manifestou a súa satisfacción polo cumprimento do que era un dos compromisos do seu goberno e porque saíu adiante "partindo dun claro exercicio de colaboración institucional" para traspasar estas instalacións "á administración con competencias propias na materia".
Silva lembrou que xa se transferiu o Pazo de Lourizán, que será inminente a da Escola de Enfermaría á Universidade de Vigo e animou á Xunta a ter "vontade política para seguir neste camiño" con outras infraestruturas, como o Centro Integrado de Formación Profesional Carlos Oroza, o Colexio de Educación Infantil e Primaria Daria González e o de Educación Especial, entre outros.
O da Escola de Cantaría foi o principal acordo da última sesión ordinaria do mandato 2019-2023, polo que a presidenta da Deputación aproveitou para recoñecer e agradecer o traballo da corporación no últimos catro anos. Tamén se despediu ao deputado socialista Santos Héctor Rodríguez, concelleiro en Vigo, porque deixa a vida política.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.