O incumprimento do convenio provocará o "probable" peche de Maderas Iglesias, segundo o comité de empresa
A CIG esixe á Xunta que traballe en buscar unha solución.
Por Europa Press / Redacción | VIGO | 02/05/2023 | Actualizada ás 18:22
O comité de empresa de Maderas Iglesias, afincada no Porriño (Pontevedra) dedicada á fabricación de tarima flotante, advertiu do "máis que probable peche" da planta, tras a demanda interposta pola banca acredora polo incumprimento do convenio, e que foi estimada na súa totalidade polo Xulgado do Mercantil 3 de Pontevedra, con sede en Vigo.
A representación dos traballadores, encabezada pola CIG, responsabilizou ás entidades financeiras da posible desaparición da empresa, que emprega a 170 persoas, pero que chegou a ter un persoal de centos de operarios e a ser lider mundial do sector.
A banca presentou demanda de incumprimento do convenio de acredores ante o xulgado, que a estimou integramente e deu por incumprido o mencionado convenio. A maxistrada recolleu na súa resolución que "non consta que a parte demandada promovese, en tempo e forma, unha proposta de modificación de convenio, ante os seus reiterados incumprimentos, con carácter previo á solicitude de incumprimento", nin que acreditase "o cumprimento do plan de pagos nos termos fixados no convenio".
Esta demanda suporá, segundo o comité, "a desaparición da empresa, que entrará en liquidación en caso de non aparecer un investidor, algo moi pouco probable tendo en conta que ata agora non se produciu, a pesar das supostas xestións realizadas pola Xunta neste sentido".
Os representantes dos traballadores manterán en próximos días un encontro con responsables do Igape para abordar a situación e buscar unha saída este problema. Con todo, lamentaron que o goberno galego comprometeuse no seu día a informar sobre calquera novidade acerca da situación da empresa ou da actuación dos bancos, pero non trasladou ningunha información ao comité "no último ano".
"NO MELLOR MOMENTO DOS ÚLTIMOS ANOS"
Por outra banda, sinalaron que a sentenza que declara incumprido o convenio chega cando Maderas Iglesias "se atopa no mellor momento dos últimos anos", con carga de traballo e co compromiso por parte da dirección da empresa de liquidar esta semana todas as débedas salariais que teñen co persoal.
Por iso, urxen á Xunta a "implicarse na solución" a este problema "provocado pola denuncia dos bancos e derivado da mala xestión da propiedade da empresa e do impacto da crise económica".
