Miñones nega de novo que estea no "trampolín electoral" para ser candidato á Xunta
Fixo estas declaracións durante a súa primeira reunión da Comisión de Sanidade e Consumo do Congreso dos Deputados.
Por Europa Press / Redacción | Madrid | 10/05/2023 | Actualizada ás 21:09
O ministro de Sanidade, José Miñones, volveu a negar este mércores que o seu paso polo Ministerio, tras ser delegado do Goberno en Galicia, sexa un "trampolín electoral" para concorrer ás eleccións galegas en 2024 como candidato do PSdeG.
Durante a súa primeira comparecencia ante a Comisión de Sanidade e Consumo do Congreso dos Deputados, Miñones recibiu varias críticas da oposición. A máis aceda por parte da portavoz de Sanidade do Partido Popular no Congreso, Elvira Velasco, quen expuxo que podería estar á fronte do Ministerio como "trampolín electoral".
Nesta liña, acusou ao Goberno de ter Sanidade "en permanente inestabilidade institucional" e con "constantes cambios", referíndose aos cinco ministros que ocuparon esta carteira desde 2018, algúns deles, como Darias e Illa, que abandonaron o cargo para concorrer a eleccións autonómicas e municipais. "Úsano como trampolín electoral", criticou Velasco.
Miñones, en cambio, defendeuse, unha vez máis, das acusacións do PP: "Xa é a terceira vez que se comenta se isto é un trampolín de cara ao meu futuro. Fun delegado do Goberno, fun alcalde do meu Concello, antes fun e son profesor e investigador, e asegúrolles que non perdo nin un só minuto do que poida pasar o día de mañá".
O ministro argumentou que ostenta o cargo "con moita honra", tras aceptar o ofrecemento do xefe do Executivo, Pedro Sánchez. "Por tanto, é unha tarefa que me ocupa ao 100 por cen e na que vou seguir", insistiu.
Por iso, recomendou á oposición que "dediquen tamén o tempo precisamente a non dedicar un minuto máis" en se o seu futuro "vai estar neste goberno ou se vai estar na Xunta de Galicia". "Non é o que me ocupa, desde logo", remachou.
Miñones tamén encaixou as críticas da deputada de Ciudadanos Sara Giménez, quen acusou a PSOE e Podemos dun "bloqueo total" na mesa do Congreso á Lei para protexer aos pacientes con ELA, que foi presentada pola formación laranxa hai xa 428 días. "Todos os deputados da cámara están conformes con que haxa unha Lei. Son 4.000 enfermos, supón unha partida orzamentaria ridícula para este Goberno, que non chega nin ao millón de euros", afeou.
Tras 44 días á fronte do Ministerio, Miñones aproveitou a súa comparecencia ante a Comisión para fixar cales van ser as súas prioridades á fronte de Sanidade, onde a súa "porta sempre estará aberta" pero afastado da loita ideolóxica. "Aqueles que buscan a confrontación coa única motivación do rédito político non van atopar neste ministro a un interlocutor válido", asegurou.
Miñones engadiu que o seu Ministerio "ten visión e misión, ademais dunha ambiciosa folla de ruta deseñada de forma coral, acordada territorialmente e profesionalmente". "E o que é máis importante, cun obxectivo político claro e incuestionable: mellorar o Sistema Nacional de Saúde, facelo máis forte, de máis calidade e sobre todo accesible a todos en condicións de equidade", remachou.
DESCULPAS POLO ATRASO NA REGULACIÓN DO CANNABIS MEDICINAL
Por outra banda, o ministro desculpouse coa sociedade, e particularmente coa deputada do PNV Josune Gorospe, polo atraso na regulación por parte da Axencia Española de Medicamentos e Produtos Sanitarios (AEMPS) do cannabis medicinal, tal e como o fixou a Comisión de Sanidade. "O primeiro que quero facer é pedir desculpas porque sei que imos tarde", sinalou.
Miñones reivindicou, no entanto, que este atraso "non é unha cuestión de mala fe nin deste ministro nin desde logo do Ministerio", senón que a razón verdadeira "é un exceso de celo". En calquera caso, comprometeuse a "poder traer o documento antes de que finalice este mes".
"Sigo trasladando ese compromiso, seguimos estudando cal é a mellor maneira de garantir a seguridade dos pacientes, de que sexa eficaz o tratamento con base ao cannabis e pronto eu creo que poderemos traer esa análise que realiza o AEMPS", finalizou.
