As inspeccións descartan que a praga de moscas que afecta a un barrio de Narón teña que ver coas granxas da zona

A Xunta asegura que non se pode atribuír a infestación de moscas que sofren varios lugares da parroquia de Val, en Narón, á actividade das explotacións gandeiras da zona. A delegada territorial da Xunta en Ferrol, Martina Aneiros, reuniuse este mércores coa directiva da asociación de veciños de Val para interesarse persoalmente pola problemática que están a sufrir e informarlles das accións acometidas pola Xunta ata o momento.

Aneiros trasladou á asociación veciñal as conclusións do último informe remitido pola xefatura territorial da Consellería do Medio Rural ao Concello de Narón, a raíz das inspeccións técnicas realizadas polos servizos veterinarios a varias explotacións de diferentes lugares da parroquia. Nelas, constatouse que tanto as condicións hixiénico-sanitarias das granxas como a xestión que realizan das deyecciones son as adecuadas.

A delegada lembrou durante o encontro que o control das pragas non é unha actividade prestada pola Administración autonómica e que os concellos, en virtude tanto da lexislación básica estatal como da galega, son autoridade sanitaria e teñen competencias de control ambiental e sanitario. As actividades de control de pragas, apuntou, desenvólvense a nivel nacional por medio de empresas inscritas nos rexistros de establecementos e servizos biocidas (ROESB) propios de cada comunidade autónoma.

"Tal e como trasladamos ao Concello de Narón en xuño de 2021, as competencias de control de pragas da Consellería de Sanidade limítanse á tramitación da inscrición das citadas empresas no ROESB de Galicia, así como o control periódico das mesmas, comprobando que o seu persoal dispoña da capacitación esixida, que utilicen produtos biocidas autorizados, etc.", dixo a delegada.

Local social de Narón. DEPUTACIÓN DA CORUÑA