Adega denuncia unha "auténtica febre do megawatio offshore" na costa galega

O parque "Breogán", promovido por Capital Energy Offshore SL, é o último tramitado até o de agora e coincide no mesmo espazo mariño co "Galwind", presentado hai 6 meses. "Ao Ministerio acumúlaselle o traballo sen ter rematado o marco legal nin a planificación sectorial, e cunhas eleccións ás portas", destaca Adega.

Nun comunicado, a entidae ecoloxista di que ten reclamado en múltiplas ocasións que sen ter modificado o marco legal, nin concluído a planificación do sector, o Ministerio debería aplicar a súa propia moratoria (disposición adicional terceira do RDL 12/2021) e non tramitar ningún parque eólico mariño.

"Porén, non só se trata do oitavo proxecto admitido a trámite nas costas galegas, senón que Breogán pula por ocupar a mesma área mariña que o Galwind, presentado a finais do ano pasado", di a entidade ecoloxista nun comunicado. Por iso, denuncia que aumenta a presión sobre os ecosistemas mariños. "Semella que definitivamente estamos diante dunha auténtica febre do megawatio offshore, na que as empresas compiten entre si por coller sitio antes de que conclúa a planificación do sector", engade.

Ademais, salienta que a recente convocatoria de eleccións estatais introduce outro factor de incerteza para o sector pesqueiro e mesmo de inseguridade xurídica para as empresas eólicas. "Co marco normativo pendente de actualizar e a planificación sectorial inconclusa e eivada, que vai acontecer cos proxectos en tramitación?", preguntase ao tempo que pide unha moratoria "efectiva e inmediata" para os proxectos enerxéticos no mar.

"Dende ADEGA insistimos na existencia de graves incertidumes e descoñecemento científico sobre os efectos destes aproveitamentos enerxéticos nos ecosistemas mariños, o que por si só debería activar a aplicación do Principio de Precaución, consagrado no tratado fundacional da UE. Continuar ignorando este feito podería conducir a outro fracaso ambiental tal como aconteceu en moitos casos coa eólica terrestre en determinados territorios como Galiza", conclúe.