Educación celebrará o 22 de xuño os exames de OPE para varias categorías salvo profesor de ruso

A Xunta celebrará o próximo 22 de xuño os exames da oferta pública de emprego (OPE) de Educación correspondente a varias categorías docentes. A excepción serán as probas para profesor de ruso en escolas oficiais de idiomas, que se celebrarán o 30.

Hai en total 9.623 persoas inscritas para acceder a 125 prazas a través de concurso-oposición en 54 especialidades: 88 vacantes de docentes de Secundaria, 17 de mestres, seis de especialistas en sectores singulares de FP, oito en escolas oficiais de idiomas, unha en música e artes escénicas, e cinco en artes plásticas e deseño.

Os datos concretos sobre data e lugar están xa publicados no 'Portal Educativo' da web da Xunta. Os que se presenten ás probas de ruso terán que ir o día 30 ao IES A Pontepedriña de Santiago ás 9,00 horas, mentres que o resto deberán presentarse no lugar correspondente á súa especialidade o 22, tamén ás 9,00 da mañá.

CONCLÚE A OPE

Estas serán as últimas probas da OPE 2022-2023, que incluíu no seu conxunto case 4.000 prazas nos últimos dous anos.

Oposicións en Silleda para técnico en coidados auxiliares de enfermaría. XUNTA - Arquivo | Fonte: Europa Press