O gasto público en cultura descendeu nos últimos 40 anos, segundo o Consello de Cultura Galega
Destaca o aumento de lectores, de libros e de bibliotecas, mentres o CCG reivindica a cultura como un dereito "que iguala a todos".
Por E.P. | | 03/07/2023 | Actualizada ás 19:04
O Consello da Cultura Galega (CCG) presentou este luns un informe sobre a evolución sociocultural de Galicia nos últimos 40 anos que advirte, entre outras cousas, dun descenso do gasto público no ámbito cultural.
En concreto, segundo o documento, o gasto da administración xeral do Estado en cultura pasou de sumar o equivalente a 233 millóns de euros en 1985 a máis de 700 millóns na última anualidade dispoñible, pero o peso no conxunto do orzamento descendeu do 0,35% ao 0,21%. Ademais, en proporción ao PIB, o recorte medido é aínda maior, xa que pasou de supor o 0,14% en 1985 ao 0,07% en 2020.
Por administracións, segundo o informe, a local pasou dun 5,37% ata o 4,15%. No caso das autonómicas, o CCG estima que o gasto en cultura no seu conxunto descendeu do 1,58% ao 0,55%. No caso concreto da Xunta, pasou do 0,68% ao 0,66% en 2020, o último ano do que se dispón do dato do gasto liquidado.
A presidenta do Consello da Cultura Galega, Rosario Álvarez, sinalou este luns en rolda de prensa que o obxectivo era que este orzamento se achegase ao 1% no ano 2022 e que se puidese alcanzar o 1,5% en 2028. "Propuñamos que o gasto se fose achegando a algo máis do que supón a cultura no PIB. Pediamos ir dando pequenos pasos", lembrou.
