Associaçom Altair recebe doaçom de quase 700 € para o seu grupo de trabalho em Santiago

Na sexta-feira, 10 de abril, às 18h, terá lugar no local de Seteportas-Altair Compostela (rua das Salvadas, n.º 22-baixo) um ato aberto ao público em que este movimento educativo receberá umha doaçom de quase 700 € que procede dos direitos de autoria do livro O pequeno é grande. A agricultura familiar como alternativa: o caso galego.

Este trabalho foi publicado em 2014 pola Através Editora, selo editorial da Associaçom Galega da Língua (AGAL). Os autores, os professores Xoán Carlos Carreira e Emilio Carral, decidiron ceder a Altair os direitos de autoria desta primeira ediçom, da qual se vendêrom mais de 400 exemplares, o que representa a cifra de 675 €. Com esse dinheiro, Altair financiará o grupo Seteportas-Altair Compostela, recentemente criado.

No ato de entrega da doaçom estará presente um dos autores, Xoán Carlos Carreira, junto o presidente da AGAL, Miguel Penas, o presidente de Altair Galiza, Bruno Faustino, a coordinadora de Seteportas-Altair Compostela, Olalla Liñares, e diversos membros de Altair Fundacional, como o seu presidente, Elias Torres.

Movimento sócio-cultural e educativo

Altair é um Movimento  Internacional Sócio-cultural e Educativo nos tempos livres concibido como um espaço para o desenvolvimento integral da pessoa onde praticar valores, desenvolver destrezas, adquirir   conhecimentos   e   competências.  Som valores de Altair, entre outros, a liberdade e a igualdade de todas as pessoas: a procura de uma sociedade de homens e mulheres livres; a igualdade de género como mecanismo transversal, naturalizada e quotidiana de convívio e relaçom entre homens e mulheres; a defesa da igualdade de oportunidades para beneficiar dos recursos e dos bens necessários para desenvolver-se numa comunidade ou a  procura e defesa da justiça social.

Associaçom reintegracionista

A Associaçom Galega da Língua (AGAL) é umha associaçom sem ánimo lucrativo, legalmente constituída em 1981, que visa a plena normalizaçom do Galego-Português da Galiza e a sua reintegraçom no ámbito lingüístico a que historicamente pertence: o galego-luso-brasileiro. A sede nacional da AGAL, como a de Altair, está em Santiago de Compostela.