O PSOE apunta a unha "purga ideolóxica" no cesamento do director do Museo de Pontevedra por orde de Rueda

O grupo do PSdeG-PSOE na Deputación de Pontevedra denunciou este mércores o cesamento do ata agora director do Museo de Pontevedra, José Manuel Rey, como unha "purga ideolóxica ordenada directamente por Rueda".

A través dun comunicado, o grupo socialista advertiu de que o cesamento de Rey (para nomear no seu lugar a Ángeles Tilve Jar) é a primeira das "purgas" que o PP vai facer na Deputación "baixo as ordes directas do presidente da Xunta, Alfonso Rueda.

Segundo trasladou o portavoz do PSOE, Carlos López Font, José Manuel Rey foi elixido en 2019 nun concurso público ao que se presentaron 9 aspirantes, "convocado cunhas bases obxectivas e que implicaban a defensa dun proxecto". Nese proceso, o que entón era director do Parque de Arte Rupestre de Campo Lameiro obtivo a mellor puntuación.

Font puxo en valor o labor de José Manuel Rey, que logrou "as mellores cifras de visitantes" na historia do museo provincial, e impulsou "unha revalorización indubidable" na institución cultural que, na práctica, "é o Museo Nacional de Galicia".

"Neste tempo o Museo estivo activo como nunca, impulsou proxectos culturais que tiveron repercusión nacional e internacional, e brillou como o referente que sempre debeu ser", proclamou o deputado socialista.

Para López Font, detrás do cesamento do director, que cualificou de "escándalo", "non hai máis que o intento do PP de volver converter o museo e a súa futura ampliación no convento de Santa Clara, nun 'chiringuito' do PP". Ademais, censurou que o novo goberno provincial non se reuniu co Consello Asesor do Museo para escoitar a súa opinión sobre unha decisión "carente de toda lóxica".

López Font advertiu de que o PSdeG "nin vai calar nin vai participar dos silencios de ninguén" e avanzou que darán "a batalla" para que o Museo non se converta en "chiringuito do PP", como "sucedeu nos tempos de Louzán e os seus antecesores".

Finalmente, os socialistas trasladaron as súas sospeitas de que a operación de Santa Clara "corre hoxe un serio risco de descarrilar" e apartarse do seu obxectivo, que é pór en valor os fondos arqueolóxicos do Museo que actualmente non poden exporse por falta de espazo.