Piden que declaren os técnicos de obra do muro que caeu e matou a un menor en Ourense
Por E.P. | SANTIAGO DE COMPOSTELA | 27/09/2023 | Actualizada ás 20:22
O muro que separaba as duchas do vestiario no pavillón do IES Julio Nespereira de Ourense, máis coñecido como o Sexto, esborrallouse en outubro do 2022 e provocou o falecemento dun menor. Case un ano despois prestou declaración, no Xulgado de Instrución, o arquitecto que deseñou o proxecto e agora a acusación particular solicita que declaren os dirixentes, inspectores e técnicos.
Así o explicou o letrado da familia, Jorge Temes, quen xa propuxera a declaración do técnico redactor do proxecto en calidade de investigado. Este arquitecto foi a primeira persoa en declarar polo sucedido. Foi o encargado de, no ano 2001, realizar o proxecto da pista deportiva e da zona dos vestiarios e duchas, o espazo onde estaba o muro que se derrubou o pasado ano.
Na súa declaración asegurou que deseñou o proxecto, pero que non o executou, aludindo a que desde a súa entrega á administración no ano 2001 non volveu ter coñecemento sobre o tema, dado que el non era o encargado nin da dirección da obra nin da execución.
O avogado da familia, quen estivo presente na declaración do arquitecto, explicou que, segundo o criterio do arquitecto, "non só cambiaron o seu proxecto senón que non estaba ben executado" posto que "non estaba arriostrado" nin chegaba ata o teito.
Por iso, a acusación particular solicita agora que declaren os dirixentes, inspectores e técnicos da obra para saber que sucedeu na construción do muro. "Queremos saber porqué cambiouse o deseño, se se cambiou, e quen tomou esa decisión", explica Temes.
Tras o sucedido, o Corpo de Bombeiros de Ourense explicou que o muro que se derrubou, causando o falecemento dun menor e feridas a un compañeiro, era de 2,80 por 2 metros de alto e 15 centímetros de ancho, cun peso aproximado de 1.230 quilos no seu conxunto. Realizado con ladrillo, morteiro e un revestimento de azulexos polas dúas caras. Polo momento non hai data para a declaración dos devanditos técnicos.
