Pontón avisa ao novo Executivo: "Seremos moi esixentes co cumprimento con Galicia"
A portavoz do BNG sinalou á "subordinación do goberno do PP a Madrid" ao longo dos últimos 14 anos.
Por Europa Press / Redacción | SANTIAGO DE COMPOSTELA | 20/11/2023 | Actualizada ás 17:42
A portavoz nacional do BNG, Ana Pontón, felicitou aos novos membros do Executivo presidido por Pedro Sánchez, aos que desexou que teñan "acertos". Ademais, avisou de que a súa formación será "moi esixente" co "cumprimento con Galicia".
"Quero felicitar aos novos ministros e ministras e desexarlles que teñan acertos no seu desempeño, porque este Goberno vai ter que enfrontar retos e desafíos tan importantes como esta crise de prezos, o cambio climático e unha situación social que non é fácil para a maioría", dixo. Tras iso, deixou claro que a súa formación vai ser "moi esixente" no "cumprimento con Galicia". "Tanto no que se refire ao cumprimento do acordo de investidura, como en investimentos, en infraestruturas e en todo aquilo que teña que ver cun trato xusto cos galegos e as galegas", afirmou.
Pontón sostivo que ao longo dos últimos 14 anos a "subordinación do goberno do PP a Madrid" fixo que Galicia "perdese o seu peso político". "E é evidente que temos que gañar ese peso político, porque nos xogamos unha parte do futuro dos galegos e as galegas", subliñou. Neste sentido, incidiu en que o Bloque "seguirá facendo o que non fai o goberno do PP na Xunta", que é "impulsar a axenda galega" en Madrid, defendendo os intereses de Galicia e mellorando a vida da xente.
