Aumenta a pobreza e exclusión en Galicia: un de cada catro galegos está en risco

O 25,5% dos galegos estaba en risco de pobreza ou exclusión social en 2023, o que supón case dous puntos porcentuais máis que en 2022, cando á súa vez baixara preto de dous puntos respecto de 2021 (25,2%), segundo a Enquisa de Condicións de Vida que publica este luns o Instituto Nacional de Estatística (INE).

Pese ao incremento, esta cifra continúa por baixo da media estatal, xa que no total de España un 26,5% dos cidadáns está en risco de pobreza ou exclusión, 0,5 puntos máis que en 2022, segundo o indicador denominado Arope, polas súas siglas en inglés (At risk of poverty and/or exclusion).

Entre outras medicións, o INE recolle que un 19,4% dos galegos está en risco de pobreza (con datos da renda de 2022), 1,4 puntos máis que un ano antes. Ademais, o 8,2% dos habitantes de Galicia ten algunha carencia material e social severa, case dous puntos máis que o 6,3% de 2022. Con todo, un 7,5% dos cidadáns vive nun fogar con baixa intensidade no traballo, en comparación co 9,5% de 2022.

A taxa de risco de pobreza co aluguer imputado cae ata o 14,7%, unha décima máis que hai un ano. Este medidor ten en conta os propietarios de vivendas, que non pagan un aluguer por vivir nas súas casas. En concreto, un 78,1% dos fogares galegos ten unha vivenda en propiedade e só o 12% vive cun aluguer de mercado. O 1,7% ten un aluguer por baixo do prezo de mercado e un 8,2% está nunha vivenda cedida.

RENDA MEDIA

A renda media neta por persoa en Galicia subiu ata os 13.147 euros en 2023, un 6,4% máis, pero continúa por baixo dos 14.082 euros da media estatal, que creceu un 8,25%. Entre outras métricas que recolle a enquisa do INE, o 38,2% dos galegos non pode permitirse marchar de vacacións polo menos unha semana ao ano, máis que o 33,1% do dato nacional.

Ademais, un 29,1% non ten capacidade de afrontar gastos imprevistos, fronte ao 37,1% do total de españois. O 9,2% dos cidadáns de Galicia recoñece ter atrasos relacionados con pagos de vivenda ou compras, por baixo do 13,6% da media nacional. Tamén un 8,6% dos galegos di ter "moita dificultade" para chegar a fin de mes, fronte ao 9,3% dos españois.