Feijóo evita apoiar a versión de Baltar sobre unha “manobra política” contra el
Di que “sigue con interese o asunto” pero que “se manifestará cando teña máis información”.
Por Galicia Confidencial | Compostela | 13/11/2015 | Actualizada ás 17:00
A denuncia contra o presidente da Deputación de Ourense, José Manuel Baltar, ante a Fiscalía por presunta prevaricación aínda dá que falar. A pesar do apoio que Alberto Núñez Feijóo lle deu o pasado mércores no Parlamento galego, este venres o presidente galego evitou entrar nesta cuestión.
Así, preguntado sobre as palabras de Baltar na entrevista a GC nas que fala abertamente dunha manobra política na súa contra xa que a denuncia foi presentada o mesmo día que se convocaron as eleccións xerais do 20D, Feijóo evitou respostar e apoiar a versión do líder popular ourensán. “Xa dixen que cando haxa algunha novidade máis me manifestarei”, indicou. “Pero xa dixo que se trata dunha manobra política?”, repetiu GC. “Insisto, cando haxa algo novo xa me pronunciarei”, limitouse a respostar o presidente galego.
Neste sentido, o presidente galego indicou que “sigue con interese ese asunto”, a denuncia presentada, “e me manifestarei cando teña máis información”. Sobre as denuncias do PSdeG que atribúen o seu apoio dos últimos días a Baltar a que o presidente da Deputación de Ourense “podería tamén tirar da manta” se non era respaldado, Feijóo foi rotundo: “Das insidias do PSdeG non hai resposta”.
