Falece un motorista tras chocar contra un coche en Cerdido

Un motorista faleceu este sábado tras colidir a moto na que circulaba contra un vehículo na estrada AC-862, ao seu paso polo municipio coruñés de Cerdido. Tal e como informou o 112 Galicia, o sinistro produciuse pouco antes das 14.10 horas no punto quilométrico 35 desa vía, na parroquia da Barqueira.

A esa hora, un particular alertaba á central de emerxencias dun choque entre unha moto e un coche. Ao ter coñecemento dos feitos, os operadores do 112 deron aviso á Garda Civil de Tráfico, ao GES de Ortigueira e aos profesionais do Servizo de Urxencias Sanitarias de Galicia-061, que nada puideron facer por salvar a vida do motorista.