Por Galicia Confidencial | Lugo | 23/11/2015 | Actualizada ás 12:06
Galicia segue sendo unha potencia en sementais vacúns. A última valoración realizada pola Confederación Nacional de Frisoa Española (Conafe) volveu a pór de manifesto o elevado nivel xenético da cabana galega, dado que a mellor vaca do Estado atópase nunha explotación agropecuaria da provincia de Lugo, mentres que oito do dez mellores sementais desta raza están na empresa pública Xenética Fontao.
Baixo da Hermida, de Sarria, é a explotación que ten o honor de ter a mellor vaca do Estado. Trátase dun animal que naceu en xuño de 2014, grazas a un programa financiado pola propia Deputación Provincial de Lugo, e que reúne unhas extraordinarias calidades xenéticas, de modo que no futuro o seu destino é converterse en nai de excelentes produtoras de leite e sementais dunha alta valoración.
En canto aos sementais, segundo a última valoración de Conafe, a empresa pública Xenética Fontao, con sede en Lugo, ten oito do dez mellores touros, co que xa se converteu en toda unha referencia mesmo no ámbito internacional.
Neste sentido, o director executivo de Africor Lugo, Ramiro Fouz, sinalou en declaracións a EFE recollidas por varios medios que a mellora xenética non é só froito de Fontao, senón tamén de "todos os gandeiros" que participan no programa de Control Leiteiro e que "proban" a calidade deses touros nas vacas das súas granxas.
De feito, lembrou que "o importante" neste caso "non é ter a vaca “número 1 en España", senón que "esa xenética se consolide" e que todos os produtores galegos "teñan moi boas vacas nas súas explotacións".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.