Por Galicia Confidencial | Lugo | 23/11/2015 | Actualizada ás 18:04
“O BNG está disposto a buscar antes acordos políticos co Partido Popular, se se produce unha situación de bloqueo na Deputación de Lugo, que a falar cun tránsfuga como o alcalde de Becerreá, Manuel Martínez”. Así de contundente se amosou este luns o portavoz do grupo provincial do BNG, Xosé Ferreiro, ao referirse ao deputado expulsado provisionalmente do PSdeG por non apoiar ao seu grupo, nin os acordos do Goberno da Deputaciónd e Lugo.
"Estamos dispostos a facer o que sexa necesario polo ben dos cidadáns da provincia de Lugo e, dado que hai unha clara situación de transfuguismo político, que altera as maiorías que deron co seu voto os cidadáns nas eleccións, temos que chegar a acordos con quen sexa necesario", suliñou.
Por iso, non descartou que o BNG fale co PP, “se é necesario” para “saír desa lameira”. “Falaremos co PP como partido político, para saír da situación de bloqueo que pode producirse na Deputación de Lugo", suliñou, “porque o BNG, lóxicamente, cun tránsfuga, non ten pensado sentar a negociar xa que calquera acordo con el sería papel mollado”. “Non tería ningún valor, porque en calquera momento podería repetir a operación e volveríanos a deixar en minoría", engadiu.
Martínez, como non adscrito
Por outra banda, o portavoz do grupo provincial do PSdeG, Álvaro Santos, anunciou que o alcalde de Becerreá, Manuel Martínez, estará no pleno ordinario que se celebrará este martes na Deputación de Lugo como "deputado non adscrito", segundo o informe emitido sobre a súa situación pola Secretaría Xeral da institución.
"A Secretaría da Deputación entende que a figura de Manolo, sempre que non se solucione, nesta situación provisional e cautelar na que non ostenta ningún cargo público en nome do Partido Socialista, é a de deputado non adscrito", precisou.
De feito, Álvaro Santos sostivo que na situación de Martínez non inflúe "en absoluto" que o rexedor de Becerreá aínda non recollese o burofax que lle remitiu o partido para comunicarlle a súa suspensión cautelar como membro do grupo provincial, nin a comunicación de Ferraz na que era informado da expulsión provisional de militancia.
"É unha condición que el ten e que lle será trasladada mañá no propio pleno. Hai un punto na orde do día no que se dá conta dese informe, que é o que cataloga a situación de Manuel Martínez de cara aos plenos que se produzan mentres existan estas circunstancias", concluíu.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.