Os gandeiros planean tractoradas en Santiago e A Coruña
A Plataforma en Defensa do Sector Lácteo, foro no que se coordinaron algunha das tractoradas que paralizaron varias cidades este outono, advirte de novas protestas. Os gandeiros están molestos porque o prezo do leite, que subiu nos supermercados, non se está a trasladar aos produtores.
Por Galicia Confidencial | Santiago de Compostela | 24/11/2015 | Actualizada ás 10:45
Desta volta non culpan as industrias que procesan o líquido, senón á distribución, que estaría a trasladar unha "nula repercusión" da suba nas tendas ao resto dos axentes do sector.
As mobilizacións están sobre a mesa, pero aínda non pechadas. O xoves haberá unha reunión con Ángeles Vázquez, a nova conselleira de medio rural. Ademais de mostrar o seu "malestar" por como están indo osp rezos, pediranlle a Administración que o Estado publique xa os decretos que establecen os prezos de referencia e o novo modelo de contrato homologado. Como indicación do seu enfado co Ministerio, unha das dúas tratoradas que se planean sería na Coruña, sede da Delegación do Goberno do Estado.
A Plataforma en Defensa do Sector Lácteo deixa claro que se non está convencida da resposta da conselleira haberá mobilizacións, tamén contra a distribución, a partir do 30 de decembro.
Segundo informa Campo Galego, o portal especializado no agro do país, "dous dos colectivos que integran a Plataforma, Unións Agrarias e a Organización de Productores de Leche propuxeran distintas accións ante a distribución e tamén ante as industrias, se ben, na reunión mantida onte, optaron finalmente por agardar acontecementos".
O sector tamén prevé negociacións coas patronais de super e hipermercados. De non haber avances, os tractores poden volver a colapsar as rúas das cidades.
