O modelo de CRTVG “independente e plural” do PP terá que agardar
O proxecto marco do ente público proposto polos populares é rexeitado e terá que ir a unha terceira votación na Cámara. A oposición critica as súas “présas" e a súa intención de querer "controlar" o ente público.
Por Galicia Confidencial | Compostela | 24/11/2015 | Actualizada ás 14:00
O novo marco da Corporación Radio e Televisión de Galicia terá que agardar a unha terceira votación. Logo de dúas votacións nas que non acadou a maioría das papeletas dos deputados da Cámara galega, terá que volver aopleno para que sexa aprobada por maioría simple cos votos do PP.
E é que este martes non acadou os 3/5 (45 votos) da maioría requirida. Tampouco puido o PP aprobala o pasado día 10 de novembro, cando eran requeridos os 2/3 (50 votos) que se esixen para que saíra adiante. Polo tanto, a norma terá que volver de novo ao pleno da Cámara lexislativa galega para que se celebre unha terceira votación. O texto que se votou este martes é o ditame da Comisión 1ª Institucional, de Administración Xeral, Xustiza e Interior, na que só o PP o apoiara co rexeitamento de toda a oposición.
Nesta nova votación non houbo debate. De feito, o PP rexeitou unha proposta de AGE e BNG para que esa votación non se celebrara. A oposición entende que esta proposta marco da CRTVG se fixo “ás presas” e coa intención de querer "controlar" a CRTVG para os próximos "nove anos".
Unha opinión moi diferente á dos populares que din que buscaron o “consenso” para o ente público pero non o atopou nos grupos da oposición. Ademais, o PP insiste que o seu é un proxecto "de televisión pública, independente e plural".
