Alertan de perdas a 35.000 clientes do Banco Popular pola conversión dos seus bonos
Ausbanc di que este cambio podería supoñer perdas dun 81% do valor adquirido xa que o banco venderaos a 3,33 euros, cando foron adquiridos a 17,61.
Por Galicia Confidencial | Compostela | 27/11/2015 | Actualizada ás 10:40
O Banco Popular comunicou este mércores á CNMV o troco obrigatorio da súa emisión de bonos por accións da entidade. Os bonistas adquiriron este complexo produto no ano 2009 por 17,61 euros e agora o troco prodúcese a 3,33 euros, o que significa, segundo a Asociación de Usuarios Bancarios (Ausbanc), asumir unhas perdas dun 81% que afectan a uns 35.000 clientes da entidade.
A día de hoxe, tendo en conta o valor da acción actual, estes clientes vense abocados a esa conversión obrigada en accións con fortes baixadas do seu valor de emisión, debendo ademais, se fose o caso, reintegrar o importe do préstamo que lles concedeu o banco para financiar a compra dos bonos. “En moitos casos a entidade ocultou ao cliente as condicións e implicacións financeiras reais do produto, aproveitándose da absoluta confianza depositada polo mesmo nese banco. O incumprimento pola entidade dos seus deberes legais abre a posibilidade de reclamar”, apunta esta entidade.
Pero, que son os bonos convertibles?. É un activo financeiro -un produto de renda fixa- que pode converterse en accións e por tanto pasar a ser un produto de renda variable. “Dita conversión pode ser voluntaria ou obrigatoria, o principal punto que debe ter en conta a persoa que o adquire, xa que se é obrigatoria, ese bono convertible non será realmente un produto de renda fixa, senón variable, xa que, antes ou despois quen o adquira pasará a ter, obrigatoriamente, accións”, explican desde Ausbanc.
Estas obrigacións obrigatoriamente convertibles son, por tanto, produtos de renda variable, non de renda fixa, e non deberían venderse, segunda esta entidade, como produtos de renda fixa, así como tampouco deberían venderse a clientes sen coñecementos, nin a suficiente información sobre os mesmos.
“Responden ao principio de outorgar solvencia á entidade, convertendo á súa vencimiento aos clientes que as adquiriron en accionistas, evitando así a devolución dos importes solicitados na súa emisión”, suliña. “Non se trata dunha opción, polo que o único transparente deste produto é que o cliente coñece que chegada a data do seu vencemento, pasará a ser accionista do banco”, engade.
