Irán, clave na estratexia de crecemento da USC

A Universidade de Santiago mantén unha estreita colaboración con institucións educativas iranianas no eido da investigación e do intercambio de coñecemento en múltiples disciplinas. Na identificación de novos campos de cooperación traballará esta semana en Santiago unha delegación da Universidade de Ciencias Médicas de Teherán (TUMS), que esta mañá foi recibida na Facultade de Medicina por Juan Viaño.

Por Galicia Confidencial | Santiago de Compostela | 25/11/2015 | Actualizada ás 16:35

Comparte esta noticia

Na benvida á USC, o reitor convidounos a coñecer “unha parte das nosas capacidades de investigación no ámbito das ciencias da saúde e que sen dúbida serán de interese para a comunidade educativa iraniana”. En efecto, logo da recepción na que tamén participaron as vicerreitoras de Internacionalización  e de Investigación e Innovación e o decano da facultade anfitrioa, asistiron a unha presentación das liñas de investigación en saúde pública, medicina legal, farmacoloxía e bioquímica.

Juan Viaño, reitor
Juan Viaño, reitor | Fonte: compostimes.com

A delegación trasladouse a continuación ao Centro de Investigación en Medicina Molecular e Medicinas Crónicas da USC (CiMUS) para coñecer as súas instalacións e asistir a varias sesións científicas onde lles explicaron as principais liñas de traballo.

Ao longo desta semana o grupo iraniano manterá tamén encontros con persoal científico e con alumnado interesado en programas de intercambio. En concreto, ademais das oportunidades que ofrece o convenio bilateral entre a USC e a TUMS, coñecerán as posibilidades do Erasmus Mundus Marhaba, o programa de cooperación e mobilidade que lidera a USC dotado con 2,4 millóns de euros. Grazas a ese programa creouse a rede IRIUC, un consorcio no que participan as cinco mellores universidades da República Islámica de Irán.

Erasmus Mundus Marhaba
O proxecto Marhaba ten por obxectivo unha maior colaboración entre a UE e as institucións de Asia para a mobilidade de estudantes e persoal e a mellora da transparencia e a empregabilidade.

Este Erasmus Mundus promove a mobilidade de 125 estudantes e persoal universitario entre a UE e Irán, Irak e Yemen nun marco de colaboración que inclúe unha representación equilibrada de nove universidades asiáticas (5 en Irán e 4 no Kurdistán) e outras tantas europeas (España, Francia, Alemaña, Italia, Reino Unido, Portugal, Polonia e Bulgaria).

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta