O BNG acusa á Audiencia Nacional de querer “desprestixiar” á Nós-Candidatura Galega

“Ninguén -nin a Audiencia Nacional nin ningunha campaña político-mediática de desprestixio- vai conseguir alterar o inquebrantábel compromiso da nosa organización coa defensa da Galiza e do seu pobo traballador”, destaca a Executiva Nacionalista nun comunicado remitido aos seus militantes.

Por Galicia Confidencial | Compostela | 26/11/2015 | Actualizada ás 08:45

Comparte esta noticia

A Executiva Nacionalista do BNG está “perplexa” e “estrañada” coa decisión da Audiencia Nacional de citar a declarar como testemuñas ao líder da formación, Xavier Vence, e ao secretario de Organización, Bieito Lobeira, no xuízo que se sigue contra a cúpula de Causa Galiza pola súa vinculación con Resistencia Galega.

Bieito Lobeira, secretario de Organización do BNG nunha rolda de prensa
Bieito Lobeira, secretario de Organización do BNG nunha rolda de prensa | Fonte: bng.gal

 

Por iso, decidiu emitir un comunicado a toda a súa militancia no que  di que “non se entende a relación -nin como persoas nin como organización política- cos feitos investigados nesta causa”. De feito, a dirección nacionalista vai máis alá e acusa á Audiencia Nacional de seguir unha “estratexia de raíz política que pretende desacreditar o BNG co ánimo de erosionar electoralmente a alternativa nacionalista, isto é, Nós-Candidatura Galega, de cara ás vindeiras eleccións xerais”.

 

Non cremos nas casualidades, e non é casual que a declaración na Audiencia Nacional, en Madrid, se produza seis días antes das eleccións xerais do 20 de decembro. A intención é obvia e torpe a un tempo: a procura da imaxe de referentes do BNG declarando na Audiencia Nacional”, indica esta misiva á que tivo acceso GC.

 

A formación nacionalista quere manifestar “con absoluta claridade que ninguén -nin a Audiencia Nacional nin ningunha campaña político-mediática de desprestixio- vai conseguir alterar o inquebrantábel compromiso da nosa organización coa defensa da Galiza e do seu pobo traballador, nin desviar a atención da nosa prioridade política imediata: conquistar o 20 de decembro os mellores resultados electorais para a alternativa representada por Nós-Candidatura Galega”.

 

Por iso, insta á militancia do BNG e ao corpo social nacionalista a “redobrar esforzos e traballo”. “Se este escandaloso proceso evidencia algo, é que o nacionalismo galego é, no noso país, o movemento político que en maior medida molesta ao poder económico e político do estado”, engade.

 

Así, denuncia que estes poderes “están dispostos a utilizar calquera método para silenciar a voz xenuína e non submisa do pobo galego”. Por iso, a dirección nacionalista suliña que actuará como sempre fixo. “Con determinación, coa cabeza ben alta e a conciencia tranquila. Non nos calarán”.

 

Este é o escrito completo:

 

Prezada compañeira:

Prezado compañeiro:

 

Con data de 20 de novembro, o Portavoz Nacional e o Secretario de Organización do BNG recibiron notificación para compareceren, o día 14 de decembro, na Audiencia Nacional (Xulgado Central de Instrución nº 6, en Madrid, que dirixe o xuíz Eloy Velasco), co fin de prestaren declaración en calidade de testemuñas no proceso 120/2015.

 

Tras recibiren a citación, o BNG solicitou información á Audiencia Nacional sobre o referido proceso, para descubrir con sorpresa que se trata das dilixencias previas abertas contra a organización política Causa Galiza, despois da detención de varios dos seus integrantes, interrogados e finalmente postos en liberdade con cargos o día 2 de novembro.

Diante desta situación, a Executiva Nacional do Bloque Nacionalista Galego xulgou preciso trasladar a toda a militancia e simpatizantes da nosa organización as seguintes consideracións políticas:

 

1. O BNG quere expresar a súa perplexidade e estrañeza por esta citación -aínda que sexa en calidade de testemuñas- a dous responsábeis políticos da Executiva Nacional. Non se entende a relación -nin como persoas nin como organización política- cos feitos investigados nesta causa.

2. Resulta máis que chamativa a data de citación. Non cremos nas casualidades, e non é casual que a declaración na Audiencia Nacional, en Madrid, se produza seis días antes das eleccións xerais do 20 de decembro. A intención é obvia e torpe a un tempo: a procura da imaxe de referentes do BNG declarando na Audiencia Nacional. Nese sentido, é evidente a existencia dunha estratexia de raíz política que pretende desacreditar o BNG co ánimo de erosionar electoralmente a alternativa nacionalista, isto é, Nós-Candidatura Galega, de cara ás vindeiras eleccións xerais.

3. O BNG quere manifestar con absoluta claridade que ninguén -nin a Audiencia Nacional nin ningunha campaña político-mediática de desprestixio- vai conseguir alterar o inquebrantábel compromiso da nosa organización coa defensa da Galiza e do seu pobo traballador, nin desviar a atención da nosa prioridade política imediata: conquistar o 20 de decembro os mellores resultados electorais para a alternativa representada por Nós-Candidatura Galega.

4. Instamos á militancia do BNG e ao corpo social nacionalista a redobrar esforzos e traballo pola consecución dos obxectivos antes expostos. Se este escandaloso proceso evidencia algo, é que o nacionalismo galego é, no noso país, o movemento político que en maior medida molesta ao poder económico e político do estado. Están dispostos a utilizar calquera método para silenciar a voz xenuína e non submisa do pobo galego. Sexamos conscientes e actuemos como sempre fixemos. Con determinación, coa cabeza ben alta e a conciencia tranquila. Non nos calarán.

 

Bieito Lobeira

Secretario de Organización

Bloque Nacionalista Galego

 

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta
Comentarios 12 comentarios

3 Rgjky

Non lles debe ir ben nas enquisas. Onte descolgouse Callón na Voz cun artículo amarelo, no que contaba cousas da súa vida propias do Sálvame e no que se proclamaba único candidato gay ao Congreso. A egolatría é o que ten. Sen saír da provincia da Coruña o candidato do PP, Miguel Lorenzo, penso que é un gay notorio, condición que nunca ocultou pero tampouco a usou de xeito vitimista.

2 ribeirasacra

O nacionalismo galego está afeito a que o ataquen permanentemente desde tódolos frontes. Eu coido que neste caso vai a volverse contra quen crea tales sospeitas. Tiña dubidas sobre o meu voto, mais xa foron didipadas. O meu voto será para NOS-Candidatura Galega.

1 Ana

A resposta da cidadania sera nas urnas o 20D con un apoio masivo a NÓS, a candidatura 100% galega. Ninguen podera co nacionalismo galego que sempre defendeu o amor polo propio, a democracia, a paz, a irmandade entre as nacions do estado e a defensa dunha Galiza prospera. Os bos e xenerosos somos NÓS.

1 Fracaso

O 21-D despois do fracaso que será (moi ao meu pesar) a candidatura de Nos quedando o nacionalismo galego fora do Parlamento quen asumirá responsabilidades?

2 nostrus

Ana, sen ánimo de ofenderte, creo que tu comentario esta fuera de la realidad porque el nacionalismo no se va comer un rosco, entre otras cosas porque estais confundidos apropiandoos del amor hacia Galicia y al mismo tiempo ir contra la voluntad popular del pueblo gallego que, en absoluto, es un pueblo renegado. El nacionalismo es una variante del racismo que hace un flaco favor al territorio que presume defender. NOS vemos el veintiuno despues del hostión.