Por Galicia Confidencial | Baio | 27/11/2015 | Actualizada ás 13:00
Un grupo de alumnas e alumnos do Instituto Maximino Romero de Lema de Baio acaba de organizar a primeira “Foliada Solidaria por Siria”. Unha iniciativa que xurde da aula "Artes escénicas e Xestión Cultural" que cursan alumnos de 1º de Bacharelato.
“Decidimos por en práctica unha proposta de traballo teórico e conseguimos facer realidade dita iniciativa para o vindeiro sábado 28 de novembro”, apuntan nun comunicado. Así, suliñan que todas as persoas que se implican no proxecto (alumnado, profesorado, asociacións do pobo, equipo de son, cartelería, artistas...) realizan o seu traballo a custo cero. “Todo un reto conseguido a base de correos e explicacións do proxecto”, apuntan.
Todo o recadado no evento será integramente para Médicos Sen Fronteiras. A proposta consta dunha visualización do vídeo "Quiero irme a casa" de Cristina Antuña, dun Microteatro AWLAD sobre a infancia na guerra de Nadia Hariri e Lia Pichel e unha Foliada Solidaria a cargo de Xurxo Souto , Taghaitaí , Do Fondo do Peto e Taín .
O concerto comezará ás 20:00h e o bono axuda será de 5 euros íntegro para Médicos Sen Fronteiras. Ao finalizar, sobre as 22:00h, dará comezo unha foliada aberta, guiada polo grupo de gaitas do centro “Vintenbaio”. “Estes rapaces e rapazas de apenas dezaseis anos queren concienciar e mostrar ao mundo que a pesar da distancia, todos debemos por o noso gran de area para axudar a aqueles que tanto o precisan”, conclúen.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.