Guía práctica para non perderse no Culturgal 2015
Queda menos dunha semana para o pistoletazo de saída. O Pazo da Cultura de Pontevedra apura os traballos para ter todo o listo para a gran cita anual da industria que tece a cultura galega. Este ano o Culturgal será 4, 5, 6 de decembro. Plano dos expositores e programa completo no interior.
Por GC Tendencias | Pontevedra | 27/11/2015 | Actualizada ás 14:00
A organización acaba de publicar o plano dos expositores presentes e toda a información práctica. O primeiro que cómpre lembrar a entrada á Feira ten un prezo de 2 euros para persoas adultas e 1 euro para menores de 12 anos.
Sobre os bonos, para visitar a Feira en diferentes días, pódese adquirir unha pulseira de 3 euros. Para entrar cando se queira , os menores de 12 anos, por 2 euros. Os menores de 3, de balde.
Sobre os horarios, lembrar que a Feira non pecha a mediodía: o horario é de 11:00 a 21:00 o venres 4 e o sábado 5 mentres que o domingo 6 pecha unha hora antes, ás 20:00.
O Pazo da Cultura de Pontevedra conta cunha ampla zona de aparcadoiro, servizos de cafetería e restauración e este ano incorpórase unha zona na que facilitar tamén a lactancia materna.
Cómpre lembra que este ano o público obterá descontos en máis de 30 bares e restaurantes de Pontevedra, que colaboran co Culturgal. Trátase dunha iniciativa nova este ano.
Para os cativos, no recinto feiral hai dous espazos permanentes dedicados ao público máis pequeno. A primeira é «Xogando miudiño (xogos e xoguetes tradicionais)», unha zona dentro da Feira na que gozar e xogar con trebellos e xogos de toda a vida. A segunda é a «Bebeteca: O bosque dos sentidos», un espazo multisensorial para bebés estruturado e deseñado para as diferentes etapas dos primeiros meses de vida, que tamén dá a benvida aos «maiores» de 2 a 4 anos.
Ademais no Culturgal 2015 o público poderá gozar de tres exposicións dentro do Pazo da Cultura de Pontevedra: «Somos espazo: simbioses entre arte e arquitectura», na Sala de Exposicións, mostra colectiva comisariada por Paula Cabaleiro e Antón Sobral co apoio do Museo de Pontevedra e Deputación de Pontevedra; «Mulleres con cesta», unha mostra organizada por Cestola na Cachola na entrada ao recinto feiral e «Spirou: de Champignac a Pontevedra» no vestíbulo do Pazo, situado no primeiro andar.
O programa completo do Culturgal 2015 aínda está suxeito a posíbeis cambios, pero unha versión actual pode consultarse neste enlace.
