"Cidades rebeldes" de todo o Estado acuden a Galicia
A alcaldesa de Barcelona, Ada Colau; o rexedor de Cádiz, José María González ‘Kichi’; o de Santiago de Compostela; Martiño Noriega; o de Valencia, Joan Ribó; o de Zaragoza, Pedro Santiesteve; e o de Ferrol, Jorge Suárez. Esta é a lista de alcaldes participantes do Encontro das Cidades Polo Ben Común deste sábado. Tamén participan representantes de Badalona, Madrid, Oviedoe e Iruña.
Por Galicia Confidencial | Pontevedra | 27/11/2015 | Actualizada ás 12:34
A conferencia de edís que gañaron o poder local tras o éxito dalgunhas das candidaturas rupturistas de base o pasado 24 M comezará a partir das 19.30 horas, en Palexco, este sábado, 28 de novembro, na Coruña.
O anfitrión, Xulio Ferreiro, desvinculou hoxe a convocatoria deste evento das próximas eleccións xerais. Cómpre lembrar que se trata da segunda xunzanta deste tipo, tras a realizada en setembro en Barcelona. A marea local, a Marea Atlántica, cualificana xuntanza como "encontro das cidades rebeldes".
Ferreiro di que destes encontros saen resultados concretos
Ferreiro manifestou esta mañá, ante os medios, que o obxectivo principal deste encontro institucional é “analizar como podemos seguir traballando de forma conxunta para resolver problemáticas que nos son comúns”.
“A idea é que nos vexamos todos de cando en vez sempre que nolo permitan as nosas obrigas nas nosas cidades e poñamos en común as nosas experiencias de traballo. Da primeira reunión saíu, sen ir máis lonxe, unha convocatoria común para un proxecto europeo
de red.es, onde nos presentamos varias cidades de forma conxunta, algo que se prima neste
tipo de candidaturas. Trátase de ir cos tempos”, argumentou o alcalde da Coruña.
Programa
Está previsto que a recepción de alcaldes e alcaldesas se inicie ás dez da mañá deste sábado. Os representantes municipais dos distintos concellos que participan no encontro municipalista serán recibidos no Salón de Plenos do Pazo de María Pita polo alcalde Xulio Ferreiro e o grupo de Goberno. Ao término, farase unha foto de familia na escaleira de honra, e está previsto un breve encontro cos medios de comunicación.
En torno as 10.45 horas da mañá os rexedores e rexedoras dirixiranse á Alcaldía Oficial para
firmar no libro de honra do Concello e, posteriormente, se trasladarán ao Salón Vermello onde terá lugar unha reunión de traballo. De xeito paralelo, produciranse outros encontros de traballo entre membros das diversas delegacións municipais.
En torno ás 12.25 horas un autobús desprazará aos representantes locais á Estación de Tren, para o seu traslado ata Santiago de Compostela, onde os representantes municipais tamén serán recibidos no Concello.
