Os alcaldes das mareas anuncian unha fronte común para reforzarse
Dez rexedores de todo o Estado, entre eles, os da Coruña, Santiago, Ferrol, Barcelona ou Madrid, descartan competir e denuncian o "afogamento financieiro" ao que están sometidos. Amosanse contrarios á unha intervención militar en Siria.
Por Galicia Confidencial | A Coruña | 28/11/2015 | Actualizada ás 13:54
Alcaldes e representantes de dez cidades nas que gobernan listas populares acordaron este sábado realizar unha fronte común para cooperar, reforzar posicións conxuntas e evitar a competencia. Neste sentido, o alcalde da Coruña, Xulio Ferreiro, anfitrión do foro "Cidades polo Ben Común", apostou pola colaboración conxunta para ser, dixo, "máis fortes".
Ao rexedor coruñés acompañárono no palacio de María Pita, sede do Concello, os seus homólogos de Barcelona, Ada Colau; Santiago de Compostela, Martiño Noriega; Ferrol, Jorge Suárez; Valencia, Joan Ribó; e Zaragoza, Pedro Santisteve, e outros representantes de Madrid, Oviedo, Pamplona e Cádiz.
"Colaboramos durante a formación das candidaturas, axudámonos uns a outros e a idea é que siga así no Goberno. Que non compitamos entre nós e que colaboremos para facernos máis fortes", apuntou Ferreiro ante os medios de comunicación.
O seis alcaldes e o resto de representantes municipais reuníronse no Consistorio coruñés para abordar asuntos sobre mobilidade, medio ambiente, facendas locais, economía sustentable e consumo responsable, transparencia, participación e seguridade cidadá.
O obxectivo final tamén está vinculado á importancia dos proxectos comúns á hora de conseguir fondos comunitarios, pois a Unión Europea premia as ideas conxuntas de diferentes localidades, algo polo que avogou Ferreiro.
Denuncian "afogamento financieiro"
No marco desta xuntanza, o alcalde de Zaragoza, Pedro Santisteve, tamén denunciou que as cidades españolas, e en particular as que participan neste foro, sofren un afogamento financeiro" que lles impide "atender os problemas da xente do montón".
Tras unha reunión de preto de dúas horas, o rexedor de Zaragoza detallou que "todos os concellos rebeldes" continúan "en pos dunha mellor coordinación para mellorar a situación de precariedade" pola "débeda" que os afoga".
Criticou tamén que "a oposición tenta socavar calquera decisión que queremos tomar", aínda que eles pretenden facer todo con "honradez, limpeza, transparencia e participación cidadá".
"Non á guerra"
Os alcaldes e representantes destas cidades, xunto con algo máis de duascentas persoas, tamén se concentraron na cidade herculina para rexeitar a guerra en Siria. Ao acto uniuse o rexedor de Oleiros, Anxo García Seoane.
Os presentes gritaron consignas como "Non á guerra", "Nunca máis" e "Non no noso nome", pois esta última frase daba nome á iniciativa. Ferreiro explicou aos medios de comunicación que o que desexan é "apoiar o sentido común da maior parte da poboación" que, "pese á dor e a conmoción polos atentados de París", sabe que o problema "non se arranxa con máis violencia".
"Débense tomar medidas coordinadas que respecten a legalidade internacional e que respecten as vidas das persoas que viven en Oriente Medio", apuntou.
Os alcaldes desprazaranse a Santiago de Compostela, onde serán recibidos polo alcalde, e posteriormente voltarán á Coruña para participar nun acto organizado pola formación Marea Atlántica, o grupo que goberna a cidade.
Neste evento, previsto en palacio de exposicións e congresos Palexco a partir das 19:30 horas, ten previsto participar tamén o alcalde de Cádiz, Pedro González "Kichi" e o secretario Político de Podemos, Íñigo Errejón.
