Por gcdeportes | Vigo | 29/11/2015 | Actualizada ás 01:57
Ficha técnica:
Celta 2: Sergio Álvarez; Hugo Mallo, Cabral, Sergi Gómez, Planas; Augusto Fernández; Tucu Hernández, Bongonda (Daniel Wass, 64’), Orellana (Josep Señé, 90’), Nolito e Guidetti (Iago Aspas, 78’).
Sporting 1: Iván Cuellar; Lora, Luis Hernández, Bernardo, Isma López; Mascarell, Nacho Cases; Halilovic, Dani Ndi (Pablo Pérez, 69), Jony (Juan Muñiz, 79’) e Sanabria (Carlos Castro, m.63).
Goles: 1-0: Orellana (minuto 15). 1-1: Carlos Castro (65’). 2-1: Nolito (84’).
Árbitro: Jaime Latre (aragonés). Amarelas a Sergi Gómez (23’), Cabral (54’) e Tucu Hernández (91’) nos celestes. Sen cartóns no Sporting.
Incidencias: partido da 13ª xornada da liga BBVA no estadio municipal de Balaídos ante 18.039 espectadores.
De rebote e con fortuna, o Celta volveu vencer en Balaídos máis de dous meses despois. Dende o 4-1 ao Barça alá polo 23 de setembro non gañaba ante a súa parroquia. Non xogaron un bo partido os celestes, que incluso sufriron o acoso rival durante moitos minutos, pero sumaron tres novos puntos, importantes para recuperar a confianza tralas dúas derrotas ante Valencia e Dépor. Orellana marcou o 1-0 na primeira parte, Carlos Castro empatou na segunda tras un agasallo do meta celeste e Nolito, de costas e de rebote tras un despexe do meta rival, fixo o 2-1 definitivo a catro minutos do final.
Despois de verse superado polo Dépor no derbi, o Toto Berizzo buscou a reacción dos seus con variacións no once: Guidetti e o belga Bongonda entraron por Iago Aspas e Wass, ademáis de Planas pola sanción de Jonny. Os trocos non supuxeron moita melloría, e incluso o Celta botou en falla aos ausentes. Os mellores minutos do Celta foron no comezo (e ao final, xa co 2-1), e axiña chegou o gol tempraneiro de Orellana. Nolito centrou ás costas da defensa, e Bongonda cedeu para o tanto do chileno (1-0, minuto 15).
Bongonda tentábao pola dereita, pero o Celta acusaba a falta de ideas en ataque, e pouco a pouco o Sporting foise estirando. Incluso marcou, pero o árbitro anulou o gol por fóra de xogo. O perigo ata o descanso chegou das filas celestes: Guidetti revolveuse na área pero o seu disparo detívoo ben Cuéllar e Bongonda tivo outra ocasión tras centro de Nolito dende a esquerda.
O Sporting, que apenas creara perigo na primeira metade, deu un paso á fronte tralo paso por vestiarios e pasou a dominar o partido, co Celta perdido no seu xogo. Os asturianos anunciaron cun par de chegadas o empate que se vía vir. Berizzo notou que o seu equipo sufría e meteu a Daniel Wass no medio por Bongonda. Pero foi o propio Sergio Álvarez quen regalou o empate a Carlos Castro, quen levaba menos dun minuto no campo (1-1, minuto 65). O gol deixou aínda máis tocado ao Celta, que tardou en reaccionar. Incluso Carlos Castro puido marcar nun remate en parábola que non atopou porta. A saída de Iago Aspas a falla de 15 minutos espertou o ataque vigués. Un pase en profundidade do moañés para Nolito deu orixe ao segundo gol celeste: Iván Cuellar tentou despexar na súa saída e o balón petou no dianteiro andaluz, de costas, e acabou na rede asturiana a catro minutos do final. A conexión Aspas-Nolito volveu aparecer, pero o longueiro evitou o terceiro dos celestes. Tres puntos para seguir cuartos con 24.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.