Os galegos non van ao dentista e ao médico por ser moi caros
Tamén suspenden aos medios de comunicación (4,67), as administracións públicas (3,98), o empresariado (3,92), as institucións relixiosas (3,53), as institucións europeas e internacionais (3,37), o sistema xudicial (3,30), a banca (2,39) e o sistema político (1,80).
Por Galicia Confidencial | Compostela | 30/11/2015 | Actualizada ás 14:00
“É demasiado caro”. É a contestación que deu case a metade das persoas que participaron nunha enquisa realizada polo Instituto Galego de Estatística (IGE) sobre a asistencia dos galegos ao médico ou o dentista para recibir atención especializada. E é que, segundo esta enquisa, o pasado ano, un total de 438.017 residentes en Galicia de 16 anos ou maiores manifestaron que necesitaban consultar a un médico ou un dentista e que non o fixeron por razóns económicas.
Segundo este módulo específico de benestar sobre a enquisa estrutural a fogares que publica o IGE, a maior parte dos enquisados consideraba que é demasiado caro (47,63 %) acudir ao dentista ao ao médico, seguido do feito de que non dispuña de tempo debido ao traballo ou a outras obrigacións (16,85 %), de que estaba na lista de espera (10,34 %) ou de que o lugar da consulta era demasiado afastado (2,54 %).
Con todo, máis da metade da poboación residente en Galicia valora a súa situación de saúde como boa (47,41 %) ou moi bo (9,92 %), mentres que algo máis dunha cuarta parte (26,91 %) considérao regular e unha pequena parte cualifícao de malo (7,37 %) ou moi malo (2,07 %).
Por iso, os galegos aproban pola mínima o seu sistema de saúde pública, que obtén un 5,98, de dez puntos. Síguelle en nivel de confianza, as forzas e corpos de seguridade (5,96), o Exército (5,62), as organizacións non gobernamentais (5,60) ou o sistema educativo (5,44).
Suspenso xeral a medios, xustiza, relixión, banca e política
Por outra banda, os galegos desconfían dos grandes medios de comunicación. De feito, non superan o aprobado ao acadar un 4,67. Peor nota teñen as administracións públicas (3,98), o empresariado (3,92), as institucións relixiosas (3,53), as institucións europeas e internacionais (3,37), o sistema xudicial (3,30), a banca (2,39) e o sistema político (1,80).
Ademais, unha décima parte da poboación galega di ter sufrido un roubo nos últimos cinco anos. En total, 237.000 galegos de 16 anos ou maiores manifestaron. Así mesmo, 1,69 % confesa ser vítima dunha agresión física, mentres que 19,63 % desa franxa de idade indica ter inseguridade cando camiña só de noite pola zona en que reside e 7,63 % confesa moita inseguridade, fronte a 22,46 % que afirma, ao contrario, ter gran seguridade.
