Jorge Suárez: “O político profesional é unha especie a desterrar”

Chegou á política activa hai menos de seis meses pero xa ten claro que non quere converterse nun “político profesional”. Jorge Suárez, alcalde de Ferrol grazas a unha marea cidadá, insiste en que hai outras formas de gobernar, diferentes as que practican os grandes partidos.  Por iso, aposta por En Marea, porque di, “vai conseguir aglutinar toda esa base política que anhela un cambio de sistema e política”.

Sen embargo, tamén recoñece que non se fixeron as cousas ben para lograr a unidade de toda a esquerda galega nesa lista. Con todo, está convencido dos seus bos resultados. “Eu escoiteille a algún persoeiro da unidade popular tirar a toalla antes de tempo. E iso é un erro. Eu escoitei frases como que a fiestra do cambio está pechada. Penso que non hai nada imposible. Hai unha campaña medica en contra”, indica.

Unha campaña mediatica que tamén existe na súa contra en Galicia porque o Concello de Ferrol ultima unha Lei de Publicidade Institucional que, “está poñendo nerviosos e impacientes” a algúns medios. “E vou dicir de quen falamos, especialmente, La Voz de Galicia, que segue o costume tradicional de poñer titulares favorables se fas, primeiro, unha publicidade institucional... Cada mañá, cando vexo a prensa e vexo que recortan a miña imaxe das fotos de forma descarada pois paréceme lamentable”, apunta.

Suárez tamén destaca o goberno de unidade co PSOE e resalta a figura de Beatriz Sestayo. “Tampouco vou facer pública unha crítica cara a ela. O único é que desempeña ben o seu traballo. Non entro a valorar os seus obxectivos políticos ou persoais. A súa actitude é a dunha persoa de esquerdas e penso que o pacto vai ser duradeiro no tempo”, indica.

Sobre a súa decisión de sufragar parte da Semana Santa lembra que en Ferrol gobernou o PP, o PSOE, o BNG, o PSOE con EU, o Partido Comunista e nunca ninguén se atreveu a eliminar esa subvención. “Nós fixémoslle fronte e chegamos a unha solución dialogada, coas confrarías, co tecido veciñal, asociativo e hostaleiro para recortala”, engade.

Tamén fala da súa relación co Exército. “Eu teño boa relación con eles. Hai que tender pontes. Eu non estou en  contra do Exército. Creo que é necesaria unha Armada para defender as soberanía dos estados. É certo que non son antimilitarista, porque senón non estaría pedindo que se construíran fragatas militares nos nosos estaleiros”.

Ti chegas á política local sen ter experiencia política, si no activismo sindical e social, pero non no político. Como levas estes seis meses de recén chegado?
É certo que eu cheguei militando de organizacións políticas e sindicais, pero nunca fun concelleiro, nin tiven experiencia previa. Desenvolvera colaboracións co grupo municipal de EU, pois son militante deste partido, e, realmente, os comezos son complicados porque os ritmos da acción política son ben diferentes aos dos administrativos. Ás veces queres actuar rápido pero hai trabas por parte do sistema que está montado que ralentiza o proceso político. Pero a miña valoración é positiva e chegamos con ilusión e esa ilusión estase transformando en feitos.

Entón iso de que hai que ter experiencia política para ser alcalde, no teu caso xa non se cumpre. Cres que non é necesaria unha actividade política previa para chegar a rexedor?
O importante é a experiencia política pero o político profesional é unha especie a desterrar. Xa sabemos o que é en Ferrol ter un alcalde que non ten máis profesión que a política e eu penso que a política está feito para que a xente de a pe poida tomar as decisións colectivamente. Creo que este alarde de xestión que se fai constantemente desde o PP, de saber facer as cousas, ao final é contraproducente porque a xente o que quere é que se identifiquen con eles e non que se tomen decisións ás súas costas e nas que non participen.

Pero a figura do político profesional está en todos os partidos; no PP, no PSOE, no Bloque...
Si.

Claro, é que tamén os hai en EU...
Políticos profesionais hai en todos os partidos. Non se poden identificar cunhas siglas, senón cunha actitude vital. Pero eu penso que é algo que, afortunadamente está mudando e todo este movemento novo de candidaturas cidadás tamén está obrigando aos partidos clásicos a amoldar as súas formas e estilo. Polo menos, estamos contribuíndo a un cambio nas súas formas de facer.

Entendo entón que queo  Jorge alcalde non se perpetuará como alcalde ou con outro cargo no futuro?
Non, non... Eu non teño grandes aspiracións políticas, nin anceios de poder. Hai tres anos tiña unha vida absolutamente normal. Veño de ser delegado sindical. Pero a miña aspiración persoal é estar aquí un ciclo curto para facer o mellor posible por Ferrol e, logo, deixar paso a outras persoas.

Con todo, ti, a diferencia doutros gobernos da marea, ti aquí asinaches pacto co PSdeG. Que tal é ese goberno conxunto?
Realmente temos bastantes diferencias programáticas e formais, pero o noso esforzo principal desde as eleccións ata chegar aquí foi deixar selado ese acordo ata o mínimo detalle cun pacto de goberno que é polo que nos vamos a rexer. Entón, xa temos os obxectivos claros. Logo é ben certo que no día a día sempre hai conflitos e roces, pero como en calquera partido. Temos a sorte de que este PSOE representa, entre comiñas, máis os valores da esquerda tradicional que o que se está convertendo o PSOE a nivel estatal, con Pedro Sánchez, cunha bandeira española detrás.

Sen embargo, a pesar de abandeirar ese socialismo, Sestayo é unha persoa moi criticada dentro do seu partido...
Eu, que traballo con ela, podo dicir que ten as súas eivas, pero é unha persoa que se empeña no seu traballo. Tampouco vou facer pública unha crítica cara a ela. O único é que desempeña ben o seu traballo. Non entro a valorar os seus obxectivos políticos ou persoais. A súa actitude é a dunha persoa de esquerdas e penso que o pacto vai ser duradeiro no tempo.

Unha das decisións polémicas que acabas de tomar é o das procesións da Semana Santa. Ao final acabaches subvencionando as procesións?
Aí houbo que facer unha ponderación entre os intereses da sociedade de Ferrol e os nosos principios e valores que son totalmente a prol do laicismo e pasouse dunha redución de 75.000 euros a 35.000.  Baixamos 40.000 euros e xa anunciándolle ás xuntas de confrarías que terían que buscar fórmulas diferentes de financiamento que non procedan de recursos públicos. É certo que Ferrol é unha sociedade complicada, totalmente polarizada. Pero a medida non foi tomada en función de intereses electoralistas, senón en función do número de turistas que visitan a cidade nesas datas. Por iso, decidimos renunciar puntualmente a eses principios de laicismo, nos que creo firmemente, como un paso de transición cara a redución ou desaparición desas axudas.

Pero o compromiso voso era 0 financiamento á Igrexa. Ao final isto non se cumpre. Non credes que é unha traición a quen vos votou?
Aquí gobernou o PP, o PSOE, o BNG, o PSOE con EU, o Partido Comunista e nunca ninguén se atreveu a eliminar esa subvención. Nós fixémoslle fronte e chegamos a unha solución dialogada, coas confrarías, co tecido veciñal, asociativo e hostaleiro. Atopamos un punto medio no que nós defendíamos non ter as mesmas subvencións que ata agora xa que houbo outras institucións con recortes. Non se trata aquí de que ninguén saíra como gañador, senón que todos se beneficiaran. E penso que a maioría da poboación así o entende, igual que a maioría dos nosos votantes.

E vas asistir a esas procesións?
Non.

Nin como alcalde?
Non. Eles xo saben. De feito, son o primeiro alcalde que non lle fixo o editorial da revista oficial da Semana Santa. Todos os rexedores anteriores a min fixeran ese saúda nesa revista que edita a Xunta de confrarías...

É dicir, alcaldes do PP, PSOE e BNG?
Si, si... Todos os que pasaron antes por aquí. E xa llo dixen. Non porque teña nada en contra deles, senón porque non son unha persoa relixiosa. Por moito que transmitan que iso é un evento social, obviamente, é un evento relixioso.

Xa falando dunha das cuestións máis importantes para Ferrol e Ferrolterra que é o emprego. Esta é unha das zonas máis deprimidas nos últimos anos, precisamente, pola crise económica. Cres que nos tres anos e medio que che restan no cargo vai cambiar esta situación?
É complicado porque Ferrol leva unha caída en barrena da súa poboación, con envellecemento, etc. Pero, por unha banda debemos ver o que facemos no formal; aglutinando a todas as forzas sociais, sindicais para reivindicar carga de traballo para o principal motor da nosa economía, que son os estaleiros, e logo facer un estímulo público cos orzamentos que poidamos desde o concello. Nós entramos aquí con obradoiros de emprego co Plan Urban para 15 persoas cada un.

Pero 15 persoas para unha poboación de 80.000, tes que recoñecer que non é moito impulso económico?
E que os recursos do concello son moi limitados. Ese é un primeiro paso. Obviamente, o obxectivo é empregar a moitas máis. E todos os nosos recursos públicos van ir destinados a isto. Por exemplo, á rehabilitación da cidade, para poder empregar a máis xente, e todo con xestión directa do concello, evitando subcontratas, con empresas doutros sitios.

Falabas dos estaleiros. Precisamene eses foron o motor da industria nesta cidade e nesta comarca. Hai visos de que a situación mellore?
Creo que aí hai moito de vontade política porque estamos falando dun sector público.

E porque non se aposta por Ferrol?
Eu estou convencido de que Alberto Núñez Feijóo deixou Ferrol por caso perdido. Xa nin tan sequera visita esta cidade. Leva como tres ou catro anos sen visitar os estaleiros. Pero por outra banda vese certos visos de recuperación, aínda que sexa nos papeis, con investigación I+D+I, eólica mariña ou das fragatas de Defensa que se pretenden materializar no 2018. Pero hai un impás de dous anos sen carga de traballo. E isto é debido a marear co dique flotante, a non facer propostas concretas en Europa  ou dicir que perdemos competitividade cando eu sei que os salarios que se cobran en Corea son maiores que os que se cobran aquí. Simplemente non houbo interese da Administración de favorecer estes estaleiros. Impulsouse a Galicia Calidade, o sector turístico e, a día , de hoxe, o 70% dos empregos de Ferrol son do sector servizos.

E falando doutro sector conectado con este, que é o militar... Que tal te levas cos mandos da Mariña na cidade?
Eu teño boa relación con eles. Hai que tender pontes. Eu non estou en  contra do Exército. Creo que é necesaria unha Armada para defender as soberanía dos estados. É certo que non son antimilitarista, porque senón non estaría pedindo que se construíran fragatas militares nos nosos estaleiros. Pero si é certo que houbo certa polémica cando viñeron aquí dous altos mandos da OTAN e eu amosei a miña discrepancia porque eu contra a OTAN si teño moito que dicir porque é responsable directo do que está acontecendo en moitas partes do mundo. Pero tamén é certo que con Defensa hai que falar, por exemplo, de como tirar a muralla do Arsenal, como é a cesión dos terreos municipais que están ocupando. Por iso é importante ter boa relación para chegar a acordos con eles. Tamén é certo que esta é unha cidade militar, aínda que está agora moi costa abaixo porque tamén reduciron moito as súas dotacións na cidade.

Tamén eu lembro como algún xornal te criticaba por reunirte con eses mandos da OTAN con “barba de tres días” y “medio desaliñado”...
Iso forma parte desas dúas Españas. Pero penso que iso é xa case caspa que, afortunadamente, estase superando, aínda que quedan certos redutos que aínda seguen xulgando ás persoas pola súa aparencia. Eu sigo dicindo que hai que xulgalas polo intelecto. E iso non quere dicir que eu o teña, ou teña máis, senón que hai que xulgalas por iso e nada máis.

Supoño que nestas xuntanzas tes falado de abrir Ferrol ao mar. Eu levo anos e anos escoitando isto. Pero, cando se vai materializar?, cando se vai poder ver o mar en Ferrol?
Pois hai dúas formas... Unha é ir uns cantos pola noite e tirala a base de martelos e outra é chegar a acordos con Defensa. Penso que isto último é posible. Tamén é certo que esa sempre foi a premisa de todos os rexedores que chegaron a esta alcaldía. Eu falei co anterior almirante e co novo, tamén con Defensa, e o que piden son tres cousas; que se determine se a muralla é patrimonio da cidade ou non, que se garanta a seguridade e onde hai un dique de reparación, que non haxa riscos de contaminación para a cidade. Imos traballar neste sentido. Hai unha parte derrubable, que é a de Porto Chico, e é unha aspiración que está aí.

Pero poderase chegar a ela ou vai quedar noutra ilusión?
Eu estou convencido de que si.

No teu mandato ou noutro?
Eu penso que no século XXI, seguro (risas)... En serio, penso que no meu mandato, polo menos, unha parte da muralla imos poder tirala cun acordo con Defensa para abrir Ferrol ao mar.

Outra das cuestións que a min, persoalmente, me gustou, foi cando decidichedes vós e o PSdeG aprobar unha Lei de Publicidade Institucional. Como está esta cuestión?
Pois hai impaciencia e nerviosismo de algúns medios de comunicación que estaban acostumados a que isto fora  un pouco a balsa onde tirarse en caso de naufraxio, pois pode rematar en xaneiro cando saia esa normativa. Penso que vai cambiar a dinámica de quen paga, manda. E todo o mundo sabemos de quen falamos... E vou dicir de quen falamos, especialmente, La Voz de Galicia, que segue o costume tradicional de poñer titulares favorables se fas, primeiro, unha publicidade institucional. De feito, nós levamos desde que entramos publicitando cousas imprescindibles como anuncios de oposicións, ou as festas, e nada máis. Cada mañá, cando vexo a prensa e vexo que recortan a miña imaxe das fotos de forma descarada pois paréceme lamentable.

Polo menos a ti non te chaman o alcalde 2.0...
Non, de momento non. Xa nin me mencionan, directamente. Aquí apostan máis polo ostracismo que pola crítica directa.

E a que se debe esa mala relacións destes grandes medios tradicionais con vós, ti aquí en Ferrol, Martiño en Santiago e Xulio na Coruña. Coincide curiosamente que La Voz nos tres sitios, e El Correo en Compostela pois que vos teñen un pouco cruzados, non?
Si. A verdade é iso. Ao cortarse a billa das subvencións a min chegáronme distintas ofertas, con distintos formatos, en vista de que non ía a haber un entendemento seguindo o formato tradicional. E, ao final, ao non frutificar pois tiraron pola crítica directa. Podemos facer bens ou mal as xestións, pero cando ti ves un medio que as propostas que ti fas en positivo se minimizan e as críticas se esaxeran pois non podes compartir esa política de medios. E todo se reduce ao porco diñeiro. 

E neste caso non pensas que pode ser un motivo de problemas futuros co PSdeG?
Que va... A guerra da voceira do PSdeG de Ferrol coa Voz comezou moito antes ca min. Non é que eu estea en guerra. Teño moitísimo respecto por todos os xornalistas que traballan nese medio porque os coñezo. Non é unha cuestión de traballadores, senón de decisións que veñen desde arriba.

Loxicamente isto non ten que ver con traballadores, senón con política editorial
Claro. Por suposto. E nisto, afortunadamente, coincidimos o PSdeG e nós.

Estamos case en campaña e v ós apoiades a En Marea. Como ves esta candidatura de cara ao 20D?
Eu penso que vai sacar un resultado histórico. Non é que tampouco me fíe de Sondaxe. Aquí non acertou moito. Eu creo que é unha candidatura que nos representa a moitos. Representa a iso que AGE non puido ser e pode crear unha onda ilusionante. A min ma creou. Tamén a xente próxima a min.

Pero pensa que ao final, é o pacto de tres partidos concretos?
Tamén AGE e un pacto de partidos. Aínda que non é o modelo perfecto porque non naceu de abaixo cara a arriba como agardabamos todos.

E por que non foi de abaixo cara arriba. Sempre, entre certos grupos, se preconiza iso e logo non se cumpre
Eu penso que, por unha parte, as candidaturas que deberiamos ter impulsado isto porque xa tiñamos unha experiencia previa, como Ferrol, Santiago e A Coruña, vímonos absorbidos pola xestión municipal, e por outra banda eu non son partidario de menosprezar ás forzas políticas de esquerda. Non me gusta meter a todos os partidos no mesmo saco. Anova, EU e Podemos non ten nada que ver con outras organizacións políticas, excepto o BNG, que tamén representa unha esquerda real. Pero senón se deu esa posibilidade é  responsabilidade de todos. Aínda así, En Marea vai conseguir aglutinar toda esa base política que anhela un cambio de sistema e política. E, por iso, o máis importante é acadar un moi bo resultado electoral e aproveitar iso de cara ás autonómicas para que o cambio na Xunta sexa definitivo.

E ti non cres que a división desa esquerda en dúas listas pode ter consecuencias electorais importantes para os dous?
O ideal, a utopía sería ter acadado esa unidade. Pero, tamén che digo que, por experiencia, é moi difícil chegar a acordos cunha forza que te está bombardeando as túas iniciativas constantemente.

Falas do Bloque?
Si. Tivo a oportunidade de entrar no goberno e non quixo. Preferiu estar na oposición. Por iso sei que, pola miña experiencia, sería moi difícil chegar a acordos con eles. Eu penso que o BNG é un suxeito político imprescindíble para Galicia. Fixo un papel político máis que honroso na historia da democracia galega, ante Europa, no Estado, pero, penso que a dinámica do BNG nos últimos tres, catro anos é errónea e non quero culpabilizalos a eles de todo porque tamén nós teremos a nosa parte de culpa.

E como ves os candidatos de En Marea, especialmente, a Yolanda Díaz de número dous na Coruña?
Eu coñezo ben de preto o traballo que fai Yolanda Díaz. Sei que é unha persoa que se emprega, que traballa horas e horas e que logo non ten moita repercusión pública ese traballo. É unha persoa absolutamente respectable e que así o consideran comités de empresa, xuntas de persoal, entidades sociais...

Eu pregúntocho porque foi elixida a dedo, non polas bases para ir nesa lista?
Si, bueno, como o resto da lista. Eu penso que se sobrevaloran as Primarias.

E non é unha incongruencia falar sempre de Primarias e logo as eleccións son desde arriba?
Eu son sempre máis partidario dos consensos que das Primarias. Veño dun mundo asembleario e sei que, moitas veces, as asembleas se poden controlar ou teledirixir ao antollo dun grupo concreto de presión e xo vimos en moitas ocasións. Por iso penso que é mellor un consenso amplo, como aconteceu para escoller a Xulio, a Martiño ou no meu caso, que apostar por unhas Primarias que pode verse alterado porque o círculo de votantes non represente ao conxunto dos simpatizantes.

Pero non deixa de ser unha incongruencia que defendades unha cousa e logo apoiedes outra, porque tanto Podemos como as mareas sempre defenderon a elección desde as bases

Eu diferenciaría por un lado o que é o asemblearismo, do que son as Primarias. Por iso digo que eu prefiro o consenso dentro dunha asemblea que unhas Primarias que poden ser pervertidas por grupos de presións ou lobbies. Eu penso que a candidatura de unidade popular non é a ideal, pero, con todo, representa a ilusión de milleiros de galegos.

Eu supoño que, en función deses resultados, tamén teremos un panorama do que pode suceder en Galicia dentro dun ano. E como ves estes comicios?
Eu escoiteille a algún persoeiro da unidade popular tirar a toalla antes de tempo. E iso é un erro. Eu escoitei frases como que a “fiestra do cambio está pechada”. Penso que non hai nada imposible. Hai unha campaña mediática para que Ciudadanos, unha forza que representa o mesmo que a vella política e cuxo candidato quere poñerse un salario de 300.000 euros.  En todo caso, penso que hai unha oportundiade para o cambio. Este movemento do 24 de maio non tivo o rodamento necesario que debera ter e, en parte, foi por responsabilidade nosa.

E sen non triunfa ese polo da dereita, hai outro que é, supostamente, o da esquerda; mareas, podemos, PSOE, IU e grupos nacionalistas. Ti ves isto posible?
Dependerá dos equilibrios. Se o PSOE está por riba da suma de Podemos, mareas e esquerda transformadora vai ser difícil. Na miña opinión persoal, e non falo como voceiro de Ferrol en Común, sería un erro pactar co PSOE estando Pedro Sánchez de presidente. Habería que votar a investidura e ter posicións críticas. Entón nese sentido pódese combinar políticas de esquerda desde a oposición. Estando por riba Podemos e os movementos populares, pois habería que aproveitar esa posibilidade para gobernar.

E iso pode ser un ensaio do ano que ven en Galicia. E fariades o mesmo sem o PSOE queda por riba de vós e con posiblidades de gobernar?
Na miña opinión persoal penso que non se debería entrar a gobernar co PSOE tendo menos votos que eles. Pero, de cara ao ano que vén, o PSOE tamén está vivindo o seu propio holocausto interno e o BNG veremos como sae destas eleccións xerais, se sae tocado ou non. Moito me temo que vai así. E logo tamén está o desgaste do PP aínda que prometan o que non fixeron nos últimos catro anos.

Para xa rematar. Ti que es militante de EU, como ves que non haxa unha lista conxunta de IU-Podemos en Madrid e si en Galicia?. Non é isto unha incongruencia?
Si. O meu referente político é Alberto Garzón desde hai varios anos. E si que se pode xerar confusión dentro da militancia e da sociedade porque penso que moita xente en Galicia vai buscar a papeleta de Alberto Garzón porque é un referente.

Pero ti non vas votar a Alberto Garzón?
Non. Eu vou votar a En Marea. Pero é unha decisión que se tomou na Executiva Federal. Houbo un acordo para que en Cataluña e Galicia se producira ese acordo e penso que é un erro que a nivel estatal non se teña feito e con responsabilidades polas dúas partes. Penso que Pablo Iglesias, Íñigo Errejón e o seu entorno tomaron unhas posicións nada favorables para ese entendemento. Pero penso que se se dera as aspiracións ían ser moi diferentes.

O de sempre, a división da esquerda favorece á dereita...
Si, si, claro.

E que falamos que pode gañar o PP por culpa de todas estas divisións
Si. Ás veces por unhas poucas persoas pois pasan estas cousas que non ten que ver co que reclama a maioría social. Pero eu son optimista. Penso que ese globo que é Ciudadanos non vai ter os resultados que lle auguran as enquisas e que o cambio aínda está aberto.