A quen deberías votar nas eleccións do 20D?

Estas eleccións xerais preséntanse como unha das máis competidas da historia da democracia española. Hai xente que xa ten decidido o voto pero aínda hai outra que non o sabe. E para eses indecisos, acábase de crear un teste orientativo. Horizonte 2015 (www.horizonte2015.com) é unha aplicación online que foi deseñada para que calquera persoa poida ver cal é o partido co que ten maior afinidade ideolóxica a partir das súas respostas nun cuestionario moi sinxelo. 

Un cidadán deposita o seu voto nas urnas durante as pasadas eleccións

A ferramenta permite aos electores comparar as súas propias opinións coas posicións dos principais partidos políticos que se presentarán ás Eleccións Xerais o próximo 20 de decembro. O cuestionario formula distintas preguntas sobre economía, sociedade,  organización do estado ou política exterior para tratar de pescudar cal é o partido político que ten unha proposta máis próxima á opinión da persoa que o contesta.

Esta iniciativa, que xa levou a cabo para as eleccións europeas, ponse por primeira vez en marcha para unhas eleccións xerais e conta co respaldo académico do Instituto de Estudos Internacionais da Universidade Complutense de Madrid, así como doutras universidades españolas e europeas.

“O carácter académico do proxecto garante a imparcialidade da ferramenta, que foi elaborada por investigadores independentes e que pretende facer máis transparente os programas dos partidos políticos e mellorar o coñecemento cidadán sobre os mesmos”, apuntan os seus programadores nun comunicado.