Formig4s e Escarlatina toman o Culturgal
A colección Formig4s (Xerais) de Pere Tabaruela e Andrés Meixide abriu o programa 2015 do Culturgal. Medio centenar de cativos dos colexios Xunqueira e Vidal Portela gozaron dunha animada conversa cos autores no espazo reservado para centros escolares do Pazo da Cultura de Pontevedra. Ledicia costas adiantou unha nova edicción de Escarlatina.
Por GC Tendencias | Pontevedra | 05/12/2015 | Actualizada ás 08:47
Mesturando xogos e faladoiros, os autores anunciaron una próxima aventura en Tokio, a que continuará esta colección que xa recolle episodios das intrépidas formigas en Paris (2014), Nova York (2014) e Barcelona (2015).
Rodeado de rapazas e rapaces Pere coordinaba unha longa fileira de voluntarios que desexaban acompañar a Andrés no debuxo das bravas FORMOS4, FORX4N, FORNL4 e FORM4AIL, as heroes da zaga. “Temos moita sorte co noso público”, salientaba Pere Tabaruela ao finalizar a presentación.
Escarlatina, a cociñeira defunta achega receitas no Culturgal
Sobre a morte non está todo dito. Doutro xeito difícil é de explicar o grande éxito da novela Escarlatina, a cociñeira defunta (Xerais, 2014), de Ledicia Costas, gañadora do Premio Nacional de Literatura Infantil y Juvenil 2015. A autora foi convidada a falar co seu público no marco do Culturgal 2015 que estase a celebrar este venres, sábado e domingo no Pazo da Cultura de Pontevedra.
No encontro, ducias de cativos deixaron a súas impresións e consultaron á autora sobre os personaxes e algúns dos episodios da novela que especialmente lembraban. Aprender a cociñar a carón dunha cociñeira morta é o desafío que fía este relato que deixou pegada dende a súa saída nos lectores.
As receitas que vai deixando Escarlatina ao aprendiz é un dos segredos do éxito, segundo a novelista. A viguesa, Ledicia Costas, estivo acompañada do ilustrador da narración, Víctor Rivas quen convidou aos pequenos a debuxar canda el personaxes e escenas da novela.
A algarabía foi grande cando Ledicia anunciou que na vindeira primavera chegará unha nova historia da cociñeira Escarlatina.
