Por Galicia Confidencial | Compostela | 10/12/2015 | Actualizada ás 16:40
Os tractores volveron este xoves á rúa colapsando varias rúas na Coruña e o centro de Lugo para reclamar que se suban os prezos do leite tal e como acordou administracións, gandeiros e industria hai unhas semanas. Unha decisión que hoxe dixo entender o propio presidente da Xunta, Alberto Núñez Feijóo, que lles recomendou que non se confundan de inimigo.
“Pídolles que teñan sentido común e que non confundan aos aliados con inimigos”, dixo na rolda de prensa posterior ao Consello da Xunta ao tenderlles a man do seu executivo para tentar resolover este problema. De feito, recoñeceu que os gandeiros “non están exentos de razón” nesta nova tractorada pola falta de compromiso de industrias e grandes superficies.
“O aliado so sector lácteo é a Xunta, non así as grandes superficies e industrias”, afirmou. Neste sentido, lembrou que está xa redactado o contrato tipo e indicou que agarda que sexa aprobado este mesmo mes. “Agradézolle a interprofesional láctea o seu traballo para poder sacar adiante este acordo”, manifestou. Tamén destacou que existe xa unha normal de cesión de prezos. “Nós imos seguir traballando polo ben do sector”, insistiu.
A pesar das boas palabras do presidente, o certo é que os gandeiros tamén criticaron a pasividade da Xunta e do Ministerio de Agricultura ante o incumprimento dos acordos por parte das grandes industrias. Así, tantos o medio cento de gandeiros que bloquearon empresas francesas na Coruña como os maís dun cento que o fixeron en Lugo insistiron na necesidade de que se aumenten os prezos do leite.
Uns oitocentos tractores convocados por Agro Muralla, segundo datos facilitados pola Policía Local, volveron a colapsar o centro da cidade na segunda tractorada do ano. Entre os manifestantes había gandeiros chegados desde practicamente todas as comarcas de Lugo, desde A Mariña até a Zona Sur, cunha notable presenza de produtores da zona centro, máis próxima á capital.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.