Por Galicia Confidencial | Compostela | 10/12/2015 | Actualizada ás 19:25
O presidente da Xunta, Alberto Núñez Feijóo, recoñece que o actual sistema de voto emigrante prexudica aos emigrantes galegos. "Creo que era necesaria unha reforma pero o seus efectos prácticos se sitúan no extremo contrario, xa que por garantir a limpeza, prexudícase aos galegos que queren exercer o seu dereito".
"Foi un acerto cambiar o sistema, pero hai que asumir que impide o voto da emigración, un erro no que non debemos caer. Porque a un español que está fóra de España non se lle pode impedir que decida o futuro do seu país, ao que probablemente quere retornar", engadiu.
Era a súa resposta a unha pregunta de GC sobre as queixas formuladas por varios emigrantes galegos en Manchester consultados por este medio. Por iso, o presidente galego destacou a necesidade de modificar de novo as condicións do voto emigrante para os quen residen no exterior poidan acudir ás urnas sen problemas.
Neste sentido, suliñou que foi "unha pena" que non se tramitase no Congreso antes do 20D a proposta que partiu do Parlamento de Galicia con tal fin. “Hai unha proposta pactada por PP e PSOE no Parlamento galego que foi remitida ao Congreso. Foi unha pena que non se tramitase e que se puidese aplicar xa nestas eleccións", apuntou.
Feijóo suliñou que a última modificación lexislativa para regular o voto exterior por parte do PP fíxose ao entender que "non había garantías constitucionais" da "limpeza" dos sufraxios que procedían da diáspora. Tamén apostou polo voto electrónico “cun aplicativo informático" para "reducir papel" e permitir exercer o dereito a voto "de forma directa e rápida".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.