Novas mortes de reses por ataques de lobo
Denuncian que mandas des lobos mataron reses en Laza, Vilar de Barrio, Serra de San Mamede e Maceda. O SLG pide que se axilicen ás axudas aos gandeiros “que tardan, como mínimo, dous anos e, ás veces cinco ou seis”.
Por Galicia Confidencial | Ourense | 15/12/2015 | Actualizada ás 10:57
O lobo volve ser o protagonista dos montes galegos e, desta volta, non por ser el a vítima, senón por ser o atacante. É o que denuncian gandeiros de varios puntos de Ourense que din que mandas destes animais mataron a varias reses nos últimos días.
Os ataques tiveron lugar en Laza, Vilar de Barrio, Serra de San Mamede e Maceda. O último deles tivo lugar na zona de Carballeda de Avia. Alí, un gandeiro deu conta da morte dunha vaca de 19 meses devorada polos lobos nun ataque ocorrido este venres pola noite.
Precisamente, o Sindicato Labrego Galego (SLG) rexistrou varias mortes de reses nunha franxa dunha semana, noutro tres ou catro explotacións gandeiras. O seu portavoz na provincia, Anxo Pérez, di que se trata de ataques "esporádicos", que non ocorren todos os días, pero que se poden chegar a concentrar en breves períodos de tempo, sendo a zona máis afectada a da Serra de San Mamede.
Desde esta central, reclaman xunto cos gandeiros medidas para evitar posibles danos en reses e para protexer de ataques aos lobos, cuxa caza está prohibida desde hai anos en España, así como o pago das axudas aos afectados. Critica que a Administración autonómica tarda como mínimo dous anos e, ás veces cinco ou seis, en indemnizar os danos aos propietarios das explotacións gandeiras.
