“Desde os micromundos provinciais tamén se pode transformar”
Eladio Medel, foi un activo militante de Podemos en Ourense, e agora é o cabeza de lista de X A ESQUERDA, unha candidatura que pretende, tamén, mobilizar ao electorado de esquerda ante a “desregulación dos mercados”. Critica á formación morada, e tamén a parte de Anova, por, segundo di, “ter como obxectivo aniquilar ao BNG”.
Por Xurxo Salgado | Ourense | 16/12/2015 | Actualizada ás 17:00
X A ESQUERDA é unha candidatura que vaille disputar o voto do descontento social a Nós e a En Marea en Ourense. Eladio Medel, avogado e escritor, é o seu cabeza de lista e foi membro da Comisión de Garantías de Podemos, do que saíu criticando as formas da formación morada.
Por iso, Medel amásase moi crítico con Podemos, que integra a candidatura de En Marea, ao igual que con outras formacións desa lista. “Ao respecto de Podemos, como parte de Anova, o seu único obxectivo é aniquilar ao BNG e esta non é a nosa idea da política, nós somos máis partidarios da mediación e de achegar posicións”.
O obxectivo da súa candidatura é que a xente “actúe”, se mova, “ante a desregulación dos mercados. Por iso, o seu slogan é “Ourense: Primeiro a xente para gobernar distinto”. Esta lista só ten representación nesta provincia “porque dende os micromundos provinciais algunha acción debe ser tentada para transformar a forza incontible da corrupción no seu contrario”.
Por que decidichedes impulsar unha candidatura de esquerdas en Ourense. Non vos convencen as que hai?
“Economía e Xustiza Cidadá” é unha plataforma cidadá que se incorpora á X A ESQUERDA, que o 26 de outubro de 2015 decide dar un paso definitivo á acción política, porque non lograremos cambiar a sociedade dende a pasividade e o desencanto, senón dende o compromiso social e a loita.
Somos a mellor candidatura posible para Ourense dende os nosos ámbitos profesionais da xustiza e a mediación, do turismo e o medio, do benestar e a inclusión social, da empresa e o emprego, da cultura e o deporte. A nosa candidatura é a mellor posible para recuperar a dignidade individual e colectiva de Ourense. Dende Ourense ímoslle dar á cidadanía o protagonismo que demanda e merece.
Moitos de vós procededes do sector crítico de Podemos. Ti mesmo encabezaches unha lista crítica en Podemos. Tivo algo que ver na presentación desta lista?
Non é certo. A única persoa da candidatura de Ourense que estivo en Podemos fun eu, e para iso non no aparato político, senón na comisión de garantías democráticas. Ao respecto de Podemos, como parte de Anova, o seu único obxectivo é aniquilar ao BNG e esta non é a nosa idea da política, nós somos máis partidarios da mediación e de achegar posicións.
E que reclamades vós que non reclamen outras listas das que xa se presentan?
X A ESQUERDA, pretende xustamente recuperar esa a noción: a de persoas conscientes do seu contorno e que reclaman á política que actúe, ante a desregulación dos mercados. De ahí o noso slogan “Ourense: Primeiro a xente para gobernar distinto”.
Cres entón que non hai ningunha lista onde o poder veña de abaixo para arriba?
A lexitimidade parlamantar de"X A ESQUERDA, vén avalada polos Verdes. Ademais de Economía e Xustiza Cidadá entre as plataformas cidadás de X A ESQUERDA está Convocatoria Cívica de Baltasar Garzón.
Ourense pola esquerda é a única destas candidaturas que se presenta. Por que non houbo listas no resto das provincias?
Nós nos presentamos en clave provincial, sendo conscientes que se están a elixir os nosos representantes provinciais non outra cousa, porque dende os nosos micromundos provinciais algunha acción debe ser tentada para transformar a forza incontible da corrupción no seu contrario.
Como estades levando a campaña?. Que actos facedes?
A impunidade na clase política e demais operadores económicos e financeiros cuxas malas prácticas contribuíron á actual situación, teñen sumida á poboación na indignación, na desesperanza e na agonía por ser exasperados por aquela ambición descontrolada. Nós mesmos estamos moi preto das vítimas desta impunidade así que estamos moi próximos a realidade que nos tocou vivir, esa é a nosa campaña, a pé de rúa.
Dentro da vosa lista hai grupos e xente que noutras provincias apoia públicamente a lista de Nós, como é o caso de Nova Esquerda Socialista. Cres que é congruente esa postura?
Por salvagardar un réxime democrático cada vez máis deteriorado veñen xurdindo novos movementos políticos e sociais, como “Economía e Xustiza Cidadá”, en defensa dos dereitos humanos e das liberdades públicas, así como da economía social e dos servizos públicos protectores dos cidadáns, que garantan a paz e a convivencia democrática. Todos aqueles que compartan estes principios iranse sumando a X A ESQUERDA estou seguro, como partidos políticos ou como colectivos sociais coma é o noso caso.
Que agardas dos comicios do 20D?
Ourense pola Esquerda reúne aos mellores candidatos para a transformación social desta provincia, tanto para o Congreso coma para o Senado, para saír do estrangulamento económico e caciquil na que nos atopamos. Agora depende da xente do seu voto non nacido pola vontade senón sostido por ela. Dun voto consciente e real.
