Como viviu Rajoy a súa agresión?
O presidente da Xunta di que reaccionou con “humor e educación”. Asegura que non hai que sacar conclusións “precipitadas” e que terán que ser a Policía e os xuíces os motivos da agresión ao presidente español.
- Rajoy pide non explotar politicamente a agresión, pero os grandes medios non fan caso
- Marea Pontevedra desminte que o agresor de Rajoy sexa desta formación
- Un menor de idade dálle unha labazada a Rajoy en Pontevedra
Por Xurxo Salgado | Compostela | 17/12/2015 | Actualizada ás 14:44
A tarde do martes 16 de decembro de 2015 vai ser recordada por moitos, especialmente, por Mariano Rajoy, por ser a primeira vez –que se saiba-- que un presidente teña levado unha boa labazada en público. Unha agresión que o líder do PP tomou con “humor e con educación”, segundo conta o presidente da Xunta, Alberto Núñez Feijóo.
O tamén líder dos populares galegos estaba presente cando Rajoy foi golpeado e estivo con el durante os momentos e horas posteriores, xa que xuntos se trasladaron á Coruña, para o mitin que estaba previsto. “Estaba a uns metros e non vin o que as cámaras recolleron”, dixo Feijóo ao ser preguntado pola agresión na rolda de prensa posterior ao Consello da Xunta.
“Chamoume a atención a actuación que tivo que é digna dun presidente do goberno, moderada e educada”, suliñou ao suliñar o comportamento que tivo Rajoy xusto despois de ser golpeado. “Tomouno con humor, como galego que é, e tamén con educación”, engadiu.
Por iso, e seguindo o manifestado polo propio presidente español, Feijóo dixo que “non hai que sacar impresións políticas precipitadas” do acontecido. “Correspóndelle á Policía e aos xuíces concretar as consideracións e os contextos nos que se movía este rapaz”, destacou.
Feijóo insistiu, en varias ocasións, sobre a necesidade de non “precipitarse” nas valoracións políticas ou en atribuír esta acción a un acto ou motivacións políticas, tal e como este xoves fixo El País na sua edición electrónica, apuntando a responsabilidade do acontecido a En Marea. Un feito que logo desmentiría.
“As valoracións que hai que facer é que o primeiro que ten que falar disto é o propio Rajoy e logo destacar que non deixou de ser presidente en ningún momento”, suliñou o presidente galego ao indicar que, en ningún momento, se viu desbordado polo acontecido. De feito, apuntou que despois da agresión, e durante a súa viaxe á Coruña para a celebración do mitin, Rajoy reviviu o acontecido con “humor”.
Por iso, Feijóo quixo suliñar que Rajoy “coñece ben ao pobo galego, pois é parte del” e o acontecido é unha “excepción” que “non vai perturbar a educación do presidente”. “Son accións moi minoritarias que nada teñen que ver co noso pobo”, engadiu.
Segundo apuntan as investigacións, o mozo detido é familiar lonxano do propio presidente do goberno e dunha familia acomodada de Pontevedra. Antes da agresión, tería sido apupado por outros amigos a través de whatsaap. De feito, algúns destes amigos estaban alí no momento da labazada e apoiaron ao agresor con aplausos, asubíos e berros de “bravo, bravo”.
