A volta a Galicia nun día
Feijóo percorrerá as catro provincias galegas este venres, para o peche da campaña. “O obxectivo é aproveitar cada minuto do que resta de campaña para mobilizar ao electorado", apunta o PP.
Por Galicia Confidencial | Compostela | 18/12/2015 | Actualizada ás 09:00
O presidente da Xunta, Alberto Núñez Feijóo, imitará a Willy Fog, pero a súa volta non será ao mundo en 80 días, senón a Galicia nun día. O líder do PP visitará ata cinco cidades nas catro provincias este venres, coincidindo co peche de campaña das eleccións xerais do 20 de decembro.
O seu periplo viaxeiro comezará en Ferrol, pola mañá. De alí irá para Coruña e, despois, a Lugo. Posteriormente trasladarase, primeiro a Ourense, e, finalmente, a Vigo. Nestas dúas cidades participará en mitins de fin de campaña.
“O obxectivo é aproveitar cada minuto do que resta de campaña para mobilizar ao electorado e pedir o seu voto para o líder do PP e presidente do Goberno Mariano Rajoy”, apunta o PP nun comunicado.
Así, segundo suliña, o titular da Xunta participou desde o inicio da campaña electoral nunha vintena de mitins e asistiu a máis de corenta actos electorais, percorrendo en total preto de 8.000 quilómetros, segundo cálculos do PP.
